SHKODËR- Një çift italianësh kanë zgjedhur Shqipërinë për të jetuar. Antonio di Dio dhe Marcella Bosio zgjohen dhe bëjnë një shëtitje në rrugët e Shkodrës. Pas shëtitjes së përditshme në rrugët e qytetit, ata ndalojnë te lokali “Te Xhani”, në Gjuhadol. Një kafe, një briosh, dhe biseda miqësore me miqtë e tyre, të ulur në lokal, kështu ata e shijojnë jetën e tyre të re dhe të bukur në Shqipëri.
Gazeta italiane “Corriere della sera”, shkruan se çifti mbërrit këtu gati dy vjet më parë nga Gassino Torinese për një arsye shumë të thjeshtë: jetesa kushton më pak.
“Në Itali me pensionin tim 1160 euro nuk do të kisha mundur të jetoja, por këtu jetoj në mënyrë dinjitoze. Çmimet janë më të lira. Në Itali kam qenë i kujdesshëm për atë që kam blerë në supermarket, këtu mund të përballoj shumë produkte të tjera. Në Itali nuk kam shkuar kurrë me pushime, por këtu shkojmë në liqen, mal apo det, ku çadrat dhe shezlonët kushtojnë vetëm pesë euro. Në Itali kam kursyer edhe për të blerë rroba. Kam veshur pothuajse gjithmonë të njëjtat gjëra, por këtu mund të zgjedh. Në Itali kujdesesha të mos e mbushja serbatorin plot me benzinë se rrezikoja të mbetesha pa para, por këtu nuk më mungon asgjë. Në Itali nuk kemi shkuar pothuajse kurrë në një restorant për darkë, por këtu mund ta përballojmë atë”, shprehet Antonio.
Pensioni në Itali nuk mjaftonte
“Këtu ndihem vërtet më i lumtur, që kur kemi ardhur në Shkodër kemi qenë shumë më të qetë. Në fakt, që kur jetoj në Shqipëri ndihem vërtet energjik”, tha ai.
Antonio dhe bashkëshortja e tij vendosen të zhvendosen në Itali në vitin 2021.
“Unë dola në pension, por ai nuk ishte i mjaftueshëm. Kështu filluam të shikonim përreth. Një nga alternativat ishte Portugalia, një tjetër Tunizia. Në fund zgjodhëm Shqipërinë”, shton ai.
Në maj 2022 nisën një udhëtim, së pari nga Vlora të cilën e kishin dëgjuar përmes disa miqve italianë.
“Por, e kuptuam se ishte një vend turistik dhe kështu u fokusuam në veri të Shqipërisë, sigurisht më pak të njohur nga turistët. Na tërhoqi menjëherë miqësia e njerëzve. Kërkuam për një shtëpi dhe tani jetojmë në ‘Skënderbeu’. vend shumë mikpritës”, tha Antonio.
“Ne jetojmë në 70 metra katrorë dhe paguajmë vetëm 350 euro qira”, shton ai.
Ata kanë gjetur rehatinë e tyre, këtu në Shkodër. Nuk flasin ende shqip, por po e mësojnë pak nga pak. Dhe në muajt në vijim do t’u bashkohet edhe Luciana, nëna e Marcellës.
“Në të vërtetë Italia nuk më mungon aspak. Kur e mendoj, tani ndihem më shumë në Shkodër sesa në Torino”, shprehet ai. /ZËRI
