TIRANË- 4 prej protestuesve që ishin mbrëmjen e djeshme në sheshin para Kryeministrisë kanë përfunduar më pranga në duar. Policia e Shtetit ka dalë me një njoftim zyrtar lidhur me arrestimin e tyre, duke zbuluar se mbi ta rëndojnë veprat penale: shkatërrimi i pronës; goditje për shkak të detyrës dhe mbajtja e mjeteve piroteknike. Në pranga kanë përfunduar Kindi Toli, Andrea Malia, Bledar Kola dhe Ismet Stefanis. Ndërsa në gjendje të lirë kanë nisur hetimet për 6 protestues të tjerë, të cilët janë identifikuar me inicialet: A. I., 20 vjeç, R. Sh., 20 vjeç, M. M., 20 vjeç, M. S., 19 vjeç, G. P., 22 vjeç, dhe D. Th., 21 vjeç. Megjithatë Policia bën me dije se vazhdon nga puna për identifikimin dhe kapjen e personave të tjerë, të cilët janë gjithashtu të përfshirë në përplasje gjatë protesës së ditës së djeshme.
NJOFTIMI I PLOTË:
DVP Tiranë
Ushtruan veprime të dhunshme gjatë protestës së ditës së djeshme, duke hedhur lëndë piroteknike (kapsolla, flakadanë, molotov), në drejtim të punonjësve të Policisë dhe të një insitucioni shtetëror, arrestohen në flagrancë 4 shtetas dhe procedohen penalisht në gjendje të lirë 6 të tjerë.
Strukturat e Komisariatit të Policisë Nr. 1, në drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Tiranë, në përfundim të veprimeve të para hetimore të kryera në lidhje me aktet e dhunës, gjatë protestës së zhvilluar ditën e djeshme, më datë 20.02.2024, bazuar në provat e grumbulluara, arrestuan në flagrancë shtetasit:
- K. T., 21 vjeç, A. M., 18 vjeç, B. K., 37 vjeç, dhe I. S., 33 vjeç.
Në vijim të veprimeve u proceduan penalisht në gjendje të lirë shtetasit:
- A. I., 20 vjeç, R. Sh., 20 vjeç, M. M., 20 vjeç, M. S., 19 vjeç, G. P., 22 vjeç, dhe D. Th., 21 vjeç.
Gjatë këqyrjes së vendit të ngjarjes u sekuestruan në cilësinë e provës materiale:
- 21 flakadanë të plasur;
- 1 bidon plastik 0.5 L, e mbushur me lëndë djegëse të dyshuar benzinë, me kapsollë të paplasur;
- 37 bidona plastikë uji, 0.5 L;
- 6 bidona plastikë të djegur, me aromë lënde djegëse benzinë;
- 3 kapsolla.
Gjithashtu, janë sekuestruar në cilësinë e provës materiale 110 kapsolla, që iu gjetën këtyre shtetasve, gjatë kontrolleve fizike. Strukturat hetimore të Drejtorisë Vendore të Policisë Tiranë, nën drejtimin e Prokurorisë, vijojnë punën për identifikimin dhe kapjen e personave të tjerë të përfshirë në akte të kundërligjshme gjatë protesës së ditës së djeshme. Materialet i kaluan Prokurorisë pra Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme procedurale./ZËRI
