SARANDË- Një sasi lënde eksplozivi është gjetur në dyqanin e një avokati në Sarandë. Mëngjesin e sotëm, teksa kishin shkuar për të hapur biznesin, punonjësit kanë gjetur një sasi eksplozivi të pashpërthyer. Tritoli është gjetur në dyqanin 'Alexandra Event', në pronësi të gruas së një avokati Ilia Thanasi, në rrugën “Adem Sheme”. Me të marrë njoftimin, Policia e Shtetit ka rrethuar zonën dhe pritet që forcat xheniere që të bëjnë heqjen e lëndës plasëse. Kjo pasi pranë dyqanit të luleve ndodhen zyrat e OSHEE dhe një shkolle publike dhe një private.
Burime për ZËRI bëjnë me dije se para se lënda plasëse të vendosej në derën e një dyqani, autori ka ulur automatin që të fikeshin kamerat e sigurisë përpara se të vendoste kallëpin e tritolit. Ka tentuar edhe që të ndezë fitilin e tritolit, por nuk dihet se përse nuk ka shpërthyer.
NJOFTIMI I POLICISË:
Sarandë/Informacion paraprak
Sot, rreth orës 08:20, në lagjen nr. 2, Sarandë, në derën e jashtme të një dyqani në pronësi të shtetasit I. Th., është konstatuar një kallëp me lëndë të dyshuar plasëse. Grupi hetimor vijon veprimet për sqarimin e rrethanave të ngjarjes, identifikimin dhe kapjen e autorit/ëve.
Dyqani ku është vendosur eksplozivi rezulton në pronësi të avokatit Ilia Thanasi, ish-kryetar i Komunës Aliko të Sarandës, por ende nuk dihen detaje lidhur nga dëshmia e tij lidhur me tritolin e vendosur në biznesin e tij. Ndërkohë që forcat xheniere janë mobilizuar për heqjen e lëndës plasëse, Policia ka nisur punën për të bërë identifikimin dhe më pas kapjen e autorit./ZËRI
