TIRANË- Një dosje hetimore që bën fjalë për “kontrabandim të medikamenteve mjekësore” dhe “Fshehjen e të ardhurave financiare” është rregjistruar në gjykatën e Tiranës. Sipas gazetarit Elton Qyno, në qendër të hetimit është biznesmeni Dritan Gremi dhe shoqëria “GremiWellness”, të cilët, sipas dosjes hetimore, dyshohen për futjen dhe tregtimin e produkteve me bazë botulinum toxin pa autorizimin përkatës në Shqipëri.
Bëhet fjalë për Dritan Gremi, i cili u shfaq edhe si kandidat i pavarur për të garuar në zgjedhjet për kryetar bashkie në Tiranë në tetor të viti 2025, zgjedhje këto që nuk u zhvilluan kurë.
Çështja penale ndaj biznesmenit, i cili administron disa klinika estetike dhe është i lidhur me 11 biznese në Tiranë dhe Elbasan, është regjistruar në Gjykatën e Tiranës, ndërsa seanca planifikohet të mbahet më 22 shtator 2026.
Megjithatë, siç mëson gazetari Elton Qyno, dosja me 2 të pandehur është ende në fazën e shqyrtimit gjyqësor në seancën paraprake dhe gjyqtare e çështjes është caktuar përmes shortit elektronik, Amarilda Sulaj.
Sipas dosjes hetimore, bën me dije se gazetari, të pandehurit Dritan Gremi dhe shoqëria e tij “Gremi Wellnes” dyshohet se kanë kryer kontrabandë të medikamente mjekësorë, kryesisht “Butox” me princip aktiv “Botulinum toxin”. Ky medikament mjekësor aktualisht nuk është i paisur me autorizim për tregtim në Shqipëri.
Ndërkohë edhe pajisjet mjekësore që vendosen në treg në Republikën e Shqipërisë, duhet të regjistrohen në Regjistrin Kombëtar të Paisjeve Mjekësore, procedurë kjo që mbahet nga Agjensia Kombëtare e Barnave dhe Paisjeve Mjekësore.
Në klinikë janë gjetur pajisje mjekësore të paçertifikuara dhe kryheshin injeksione nga persona të cilët nuk janë mjekë por estetiste. Fakt ky i konfirmuar nga disa pacientë që janë pyetur.
Shkeljet janë konstatuar gjatë një kqyrje fizike në ambjentet e “Gremi Clinic” që është kryer nga policia gjyqësore në datën 17 korrik 2025. Gjithashtu, sipas dosjes hetimore po në vitin 2025, gjatë një raporti të Kontrollit Tatimor mbi këtë biznes, është konstatuar se shoqëria Juridike, “Gremi Wellnes” ka detyrime tatimore dhe gjoba të papaguara që shkojnë në shumën financiare prej 285 milion lekë të vjetra.
Kjo kompani dhe pronarët e saj, bashkëjetuesit Dritan Gremi dhe Anduena Çela, prej Janarit 2021 kanë operuar si biznes me objekt tregtar fillimisht për “...aktivitete të këshillimit për biznes dhe këshilla të tjera për menaxhimin...”.
Por në muajin Nëntor 2025, objekti i kompanisë ndryshoi duke shtuar aktivitetin në fushën e menaxhimit të strukturave të ndryshme në fushën e shëndetësisë.
“...kryesisht klinikave të kirurgjisë estetike dhe trajtimeve të tjera estetike, duke marrë përsipër menaxhimin në total të burimeve njerëzore dhe marrëdhënieve me pacientët (caktimi i orareve të vizitave, të orareve të ekzaminimeve, të trajtimeve estetike dhe kirurgjikale, promovimet dhe ndjekja e politikave për zgjerimin e nr. të pacienteve etj....”-thuhet në objektin e veprimtarisë tregtare të ndryshuar në muajin Nëntor 2025.
Por vetëm pak ditë pasi Dritan Gremi, i ndryshoi objektin e veprimtarisë tregtare kompanisë “Gremi ëellnes”, ai në 27 Nëntor 2025, vendosi t’ia shesë 100 për qind të aksioneve të kësaj kompanie, bashkëjetueses së tij, Anduena Çela. Kontrata e shitjes është firmosur para noteres Aida Hoxha në Tiranë dhe shitja është bërë kundrejt një çmimi prej 1 milion lekë të vjetra.
Por aktualisht në emër të Dritan Gremit, vijojnë të jenë disa kompani të tjera si “Gremi Longevity Center”, “My Albania News”, “Gremi Sweet Bread”, “La Belle Noiseuse”, “Hotel Serenity”, “Gremi Clinic”, “Dritan Gremi”, “Viaggiare e Sorridere” e të tjera.
