TIRANË- Gjatë mbledhjes së Komisionit të Sigurisë një nga temat e diskutuara ishte edhe cilësia e ushqimit në burgje. Deputeti i opozitës, Asllan Dogjani tha se familjarët dërgojnë ushqim në burgje pasi nuk është cilësor.
Ndërsa, Drejtori i Përgjithshëm i Burgjeve, Klevis Qose tha se të dënuarit kërkojnë ushqim nga familjarët, pasi ky është kthyer në një trend. Ai tha se ushqimi është cilësor dhe ai e ka provuar vetë ushqimin në burgje së bashku me ministrin. Ai tha se është toleruar sjellja e ushqimit si indikator në procesin e rehabilitimit.
“Shko para burgut familjarët e çanta në shpinë njëherë në javë për të dërguar ushqime? A ju dërgoni ushqim ju? Pse të burgosurit nuk e hanë ushqimit? Qytetarët paguajnë taksat, asnjë nuk e ha sepse thonë që nuk është ushqimi i duhur”, tha deputeti Asllan Dogjani.
“Sa i përket pyetjes për ushqimin, në fakt nuk është e vërtetë. Kam qenë vetë në IEVP dhe kemi ngrënë vetë ushqim, unë ministri e bashkëpunëtorët e mi. Por është një trend në burgje për të treguar kapadaillëkun e vet çdo i dënuar, do ta marrë ushqimin nga jashtë. Pavarësisht masave tona në uljen e sasisë, por e kemi futur si një nga pikat e procesit të rehabilitimit për lejimin e futjes së ushqimit nga familjarët duke sjellë ushqim, dikush sjell pak mjaltë, dikujt ia bën bashkëshortja, dikujt vajza se ka me burgim të përjetshëm, se i kanë lënë fëmijët 2 vjeç dhe janë bërë vajzat nga 30 vjeçe, janë martuar dhe i sjell një ushqim. Është toleruar, si indikator në procesin e rehabilitimit”, iu përgjigj Drejtori i Përgjithshëm i Burgjeve, Klevis Qose. /ZËRI
