KROACI- Një influencere shqiptare është vendosur në pranga pasi ka vrarë 2 persona gjatë një aksidenti rrugor. Kroacia është tronditur nga një tragjedi pak ditë më parë, pasi 29-vjeçarja Klevisa Ymeri ka vrarë vëlla e motër, 21-vjeçari Stjepan dhe 19-vjeçarja Katarina Derek. Si pasojë, e reja nga Shkodra ka përfunduar në pranga. Shqiptarja ka qenë duke lëvizur me një fuoristradë "BMW", me targa sllovake e me shpejtësi gati 170 km/h kur është përplasur me makinën e të rinjve që kanë humbur jetën në vendngjarje.
Vetë e reja shqiptare ka pësuar lëndime të lehta dhe për këtë arsye është transferuar në repartin e kirurgjisë abdominale në Spitalin e Përgjithshëm të Dubrovnikut. Atje është arrestuar dhe është marrë në pyetje pasi akuzohet për parakalim të pakujdesshëm dhe shkaktimin e një aksidenti me vdekje. Mediat kroate raportojnë se as Ymeri dhe askush nga familja e saj nuk ka kontaktuar me familjen Derek për t'i shprehur ngushëllimet dhe keqardhjen e tyre.
"Dubrovnik INsider" ka kontaktuar me Viktor Đerek, vëllanë e viktimave, i sili është shprehur: Nuk duam që tragjedia e familjes sonë të jetë e kotë, kemi nevojë për ndihmën e publikut për të ndërgjegjësuar problemin, e njëjta gjë ndodh gjatë gjithë kohës në rrugët tona. Vëllai dhe motra ime nuk janë të vetmit që kanë vdekur, por le të jenë të fundit.
E reja shqiptare ka qenë e njohur për mediat edhe në vendin tonë, pasi vendosi të surprizonte një shoqe që ndodhej në burg në Trento të Italisë. Ajo së bashku me shoqet i është afruar burgut dhe lëshoi fishekzjarrë. Ymeri ka një sërë profilesh në rrjetesh sociale, ku bën foto dhe video dhe jep këshilla për grimin. Ajo kishte 33,000 ndjekës në TikTok dhe pothuajse 14,000 në Instagram, por profilet e saj aktualisht janë të mbyllura./ZËRI
