TIRANË- Artan Tafani, i penduari i drejtësisë ka tronditur radhët e drejtësisë kur ka rrëfyer se Doloreza Musabelliu, një nga prokuroret e SPAK ishte vënë në shënjestër të grupit të Laert Haxhiut, me qëllim eleminimin fizik të saj apo të familjarëve të saj.
Gazetari Elton Qyno shkruan për OraNews se Tafani ka rrëfyer një plan të detajuar për mënyrën se si ishte planifikuar goditja e tre anëtarëve të drejtësisë shqiptare, Doloreza Musabelli prokurore në SPAK, Merita Selimi ish-prokurore në Lushnjë dhe avokati Adriatik Doga. Ky i fundit i ka shpëtuar vrasjes në muajin Tetor në vitin 2021 në Lushnjë. Për vrasjen e avokatit, sipas Tafanit ishte impenjuar personalisht Laert Haxhiu, ndërsa rol si bashkëpunëtor kishte pasur edhe Lulzim Arapi.
Vrasja e avokatit ka dështuar për fije pasi, në momentin kur grupi kriminal zbarkoi me arsenalin e armëve para banesës së objektivit, Adriatik Doga, rastësisht ka takuar një fqinjin e tij. Kjo ka bërë që Artan Tafani, Laert Haxhiu dhe Lulzim Arapi, të mos veprojnë e të tërhiqen.
Ndërsa ish-prokurorja Merita Selimi ishte shënjestruar prej tyre pasi kishte hetuar Laert Haxhiun, Orgest Bilbilin dhe Anterio Kaloshin për masakrën e vitit 2017, ku mbeti i vrarë Zamir Latifi dhe Jurgen Hoxha, ndërsa u plagosën Bujar Turku dhe Marjus Xhepexhiu.
Pas dy viteve hetime, Selimi shpalli moskopetencën duke sjellë dosjen ndaj tre të pandehurve në SPAK. Prokurorja Merita Selimi u shkarkua nga Komisioni i Pavarur i Kualifikimit në muajin Korrik të vitit 2023.
Çeshtjen kaloi në dorën e Doloreza Musabelliut, prokurore në SPAK, e cila kërkoi dënimin me burgim të përjetshëm për Orgest Bilbilin dhe Anterio Kaloshin. Haxhiu është ende në fazë gjykimi. Tafani tregon se të dyja prokuroret janë ndjekur për disa muaj.
“…Laerti ka dashur të sulmojë Doloreza Musabelli, pasi ishte prokurorja e çështjes së tij në SPAK. Kjo prokurore kishte dënuar me burgim të përjesthëm shokun e Laertit Orgest Bilbilin dhe Anterio Kaloshin. Ndërsa tashmë vijonte gjyqin për dënimin e Laertit. Laerti, pretendonte se nuk kishte lidhje me ngjarjen dhe se kjo prokurore po ja bënte gropën. Atij ju fiksua që ta vriste prokuroren ose ndonjë njeri të afërm të familjes. E kemi ndjekur prokuroren Doloreza Musabelli, për disa kohë me rradhë. I kemi bërë foto asaj, burrit avokat dhe fëmijëve. Laerti tha se fotot e fëmijëve duhet më parë t’ia nisnim burrit të prokurores për të parë se çfarë ndikimi dhe reagimi do sillte. Më pas do veprohej për të ekzekutuar prokuroren Musabelli ose ndonjë nga njerëzit e afërm të saj. Laerti kishte siguruar armët dhe gjithçka tjetër…”-ka deklaruar bashkëpuntori i prokurorisë Artan Tafani.
Artan (Marjus) Tafani deri më tani, përmes dëshmisë së dhënë, Tafani ka zbardhur vrasjen e: Alban Semakut, 17 Tetor 2021; Çajup Selimit, 1 Qershor të 2021; Albi Bashaliu, 27 Dhjetor 2021; Fridmand Xhaferrajt, 13 Maj 2021; Lulzim Qorrit, 12 Dhjetor 2018 (Athinë) dhe Dikens Halilit, 3 Tetor 2021 (Athinë).
Pas rrëfimit të Tafanit janë vënë në pranga 12 persona në kuadër të operacionit ‘Never Forget’ si dhe katër të tjerë janë shpallur në kërkim. Organizatori i krimeve të rënda, sipas Tafanit, është Laert Haxhiu që ndodhet pas hekurave në Greqi.
