BRITANI- Gangsterët shqiptarë kontrollojnë tregun e drogës në Britani dhe po mbushin burgjet britanike shumë shpejt. Këtë e bën me dije “Daily Mail” në një atikull të fundit ku shkruan se Qeveria britanike synon dërgimin e disa prej tyre sa më shpejt në Shqipëri në sajë të marrëveshjes së nëshkruar me autoritetet shqiptare. Bandat shqiptare tani 'ushtrojnë kontroll të konsiderueshëm' mbi furnizimin me kokainë, zbulon një raport i Kombeve të Bashkuara. Sipas ''Daily Mail'' kriminelë të dhunshëm importojnë drogën në kontinentin e Evropës përmes porteve në Anglinë juglindore.
Më herët, një gjykatës paralajmëroi se “shtëpiat e barit” që drejtoheshin nga rrjetet kriminale shqiptare kishin arritur 'nivele epidemike' dhe, sipas gjykimit të tij ishin kthyer në “industri”. Të ndihmuar nga aleancat me kartelet e drogës të Amerikës së Jugut, gangsterët po e përforcojnë kontrollin e tyre duke përdorur një kombinim të frikës dhe dhunës vdekjeprurëse, ndërkohë janë aktiv në mediat sociale ku publikojnë foto të drogës, armëve dhe parave.
Së fundmi doli se 80 emigrantë shqiptarë janë dënuar me gjithsej 130 vite burg gjatë katër muajve të parë të vitit. Krimet e tyre përfshinin vrasje, përdhunim, armëmbajtje pa leje dhe rrëmbim. Shkalla e valës së krimit po ushtron presion mbi burgjet tashmë të ‘’shpërthyera’’ në Mbretërinë e Bashkuar, me Qeverinë e detyruar të bëjë marrëveshje me Tiranën për të lejuar deportimin e kriminelëve përpara përfundimit të dënimit.
Megjithatë, disa të rinj shqiptarë po futen fshehurazi në Britaninë e Madhe dhe po bashkohen me bandat e drogës me qëllim që të dërgohen në burg, në mënyrë që të mund të pretendojnë se janë viktima të skllavërisë moderne dhe të fitojnë azil, siç zbuloi së fundmi MailOnline. Tregu i kokainës në Mbretërinë e Bashkuar thuhet se vlen 2 miliardë paund me rreth 976,000 përdorues, ndërsa numri vjetor i vdekjeve të lidhura me kokainën është rritur shtatëfish në një dekadë dhe tani është 840.
Hulumtimi i Agjencisë Kombëtare të Krimit ka treguar se grupet e krimit të organizuar nga shqiptarët kontrollojnë tregun e kokainës në të gjithë qytetet kryesore dhe zonat periferike të MB (me përjashtim të Merseyside, ku bandat vendase mbeten në krye). Një nga bandat më famëkeqe shqiptare është The Hellbanianz, të cilët janë të vendosur në pronën Gascoigne në Barking, në lindje të Londrës.
Ata besohet se janë përgjegjës për trafikimin e miliona paund drogë në MB çdo vit dhe mburren me aktivitetet e tyre kriminale me video rrep në mediat sociale. Zotët e krimit shqiptarë janë të njohur për dërgimin e 'lëkurave të pastra' pa precedentë kriminalë në MB për t'u bashkuar me bandat e krimit të organizuar./ZËRI
