DUBAI- Marklen Haka, anëtar i bandës së Niklës është arrestuar në Dubai. Ai u shpall në kërkim në kuadër të operacionit “Revanshi”, ku ndaj tij rëndojnë 3 vepra penale. Haka akuzohet për vrasje të mbetur në tentativë ndaj Durim Bamit, pjesëmarrje në grup kriminal dhe armëmbajtje pa leje.
Kush është Marklen Haka
Marklen Haka është pjesë e “Bandës së Niklës” dhe i ka shpëtuar dy atentateve, një në vitin 2019 dhe një në vitin 2022. Në qershor të viti 2022 Haka shpëtoi mrekullisht nga një breshëri plumbash, vetëm njëri prej tyre e kapi rikoshet në nofull.
Më 12 shtator të vitit 2018, Mariglen Haka u arrestua bashkë me të atin e dy persona të tjerë përfunduan në Polici. Policia arriti të gjente vetëm disa armë pa leje. Në lidhje me këtë arrestim, Haka u dënua me 1 vit heqje lirie. Dënimin që e përfundoi në korrik të 2019. Dy muaj më pas e plagosën, ndërsa mbeti e vrarë halla e tij, 50- vjeçarja Shpresa Basha. Po ashtu, Haka njihej për miqësinë me Valter Bamin, vëllain e Durim Bamit, i cili e transportoi të plagosur në spital në 2019-ën.
Por miqësia nuk do të zgjaste shumë. Një vit më vonë në 2020 i bëhet atentat Durim Bamit. Në drejtim të tij u qëllua me kallashnikov. Ai ishte në timon dhe po drejtonte një mjet "Range", brenda të cilës ishte edhe kushëriri i tij Ervin Kodra, 35 vjeç që mbeti i plagosur.
Në maj të këtij viti (2024) SPAK zhvilloi në operacion, i cili, u finalizua në bashkëpunim me Europol dhe u shtri në disa qytete si Tiranë, Durrës, Vlorë, Lezhë, Fushë Krujë dhe Rrëshen, ku u lëshuan 50 urdhër-arreste. Në dosjen e SPAK të siguruar nga ZËRI, rezulton se tre ishin personat që kishin marrë përsipër detyrën për të eliminiuar Durim Bamit me porosi të Ervis Martinajt: Marklen Haka, Albert Zaja dhe Hektor (Tori) Xheçuka. Ditën e atentatit ishin Xheçuka dhe Kelmendi ata që qëlluan drejt mjetit "Range Rover" të Durim Bamit, ndërsa Marklen Haka i njoftoi të dy për lëvizjet e Bamit në zonën e Fushë Krujës, ndërsa Zaja për lëvizjet e tij teksa udhëtonte në aksin Kamëz-Tapizë.
Pakti i Marklen Hakës me Ervis Martinaj
Në dosjen e SPAK ku janë zbardhur përgjimet nga Sky ECC mes bandave kriminale, është një bisedë e zhvilluar mes Ervis Martinajt dhe Marklen Hakës. Ky i fundit i betohet Martinajt se nuk ka lidhje me vrasjen e Aleksandër Ndokës, vëllait të ish-deputetit socialist Arben Ndoka. Ndërkohë Martinaj i kërkon që të bashkëpunojë dhe ti tregojë emrat e personave që kanë marrë pjesë në vrasjen e Santiago Malkos. Në këmbim, Martinaj do ti tregonte personat që kanë qëlluar mbi hallën e tij, duke e lënë të vdekur, në tentativë për të vrarë Marklen Hakën.
/ZËRI
