TIRANË- Policia e Shtetit ka bërë me dije se ka vendosur në pranga në Emiratet e Bashkuara Arabe, 40-vjeçarin shqiptari Hajdar Bako (i njohur me nofkën "Dari i Dubait"). Në një njoftim të bërë zyrtarisht nga Policia, Bako alias Hajdar Çopja (Hysa) është dënuar me 4 vite burg për plagosje.
40-vjeçari, i lindur në Elbasan, është i dënuar me 4 vjet burgim, për veprën penale “Plagosja e rëndë me dashje”. Në vitin 2017, në fshatin Katund i Ri, Bako, së bashku me 4 persona të tjerë, është implikuar në një konflikt, gjatë të cilit është qëlluar me armë zjarri dhe janë plagosur 3 persona të identifikuar: Alfred Gjini, Klevis Gjini dhe Emiljano Gjini.
Por emri i “Darit të Elbasanit” përmendet edhe nga i penduari i drejtësisë Nuredin Dumani, i cili e përmend si një nga porositësit për eliminimin fizik të rivalëve të tij në dosjen e Nuredin Dumanit. Sipas këtij të fundit, grupi i Erjon Alibej alias Agim Shurbi me pseudonimin “Krymi” dhe grupi i Hajdor Bakos alias (Çopja), i thirrur shkurtimisht “Dari”, ishin të vendosur për të eliminuar njëri-tjetrin.
Po ashtu, edhe në Belgjikë është vendosur në pranga 39-vjeçari, me inicialet A. G. për kultivim të lëndëve narkotike.
NJOFTIMI I PLOTË:
Policia e Shtetit/Finalizohen 2 operacione për kapjen e shtetasve shqiptarë, të shpallur në kërkim ndërkombëtar. Operacioni “Surnames”/I dënuar për plagosje të rëndë me dashje, lokalizohet dhe arrestohet në Emiratet e Bashkuara Arabe, 40-vjeçari. Operacioni “Area”/I akuzuar për kultivim të bimëve narkotike cannabis sativa, në Fier, në vitin 2021, lokalizohet dhe arrestohet në Belgjikë, 39-vjeçari.
Si rezultat i sigurimit të informacionit nga strukturat e Policisë së Shtetit, për vendndodhjen e 2 shtetasve të shpallur në kërkim ndërkombëtar, për llogari të shtetit shqiptar, dhe shkëmbimit të këtij informacioni, nëpërmjet zyrave homologe të Interpolit: -u kap në Emiratet e Bashkuara Arabe, shtetasi Hajdar Bako alias Hajdar Copja alias Hajdar Hysa, 40 vjeç, i lindur në Elbasan, pasi është i dënuar me 4 vjet burgim, për veprën penale “Plagosja e rëndë me dashje”. Në vitin 2017, në fshatin Katund i Ri, ky shtetas, së bashku me 4 të tjerë, është implikuar në një konflikt, gjatë të cilit është qëlluar me armë zjarri dhe janë plagosur 3 shtetas; -u kap në Belgjikë, shtetasi A. G., 39 vjeç, pasi Gjykata e Fierit, më datë 15.10.2022, i ka caktuar masën e sigurisë “Arrest në burg”, për veprën penale “Kultivimi i bimëve narkotike”. Më datë 15.07.2021, gjatë kontrollit në tokën në pronësi të 39-vjeçarit, në zonën Grizë Lenginas, Fier, u gjetën të mbjella bimë narkotike cannabis sativa. Vijojnë procedurat për ekstradimin e 2 shtetasve, në Shqipëri./ZËRI
