LONDËR- 8 shqiptarë të dënuar për vepra të ndryshme penale në Angli, janë transferuar në Shqipëri. Media britanike “Daily Mail” ka shkruar rreth veprave penale që ata janë dënuar në Angli, ku mes tyre përfshihen krime të rënda si: vrasje, sulme seksuale, përdhunime dhe trafik droge. Ata janë ekstraduar në Shqipëri si pjesë e planit të qeverisë britanike për të transferuar të burgosurit në vendet e tyre, skemë kjo që ka kushtuar 4.3 miliuonë paund.
Rreth 200 nga kriminelë, të dënuar për krime të rënda, përfshirë: vrasje, sulme seksuale dhe anëtarë të grupeve të trafikut të drogës do të ekstardohen në vendet e tyre, si pjesë e një plani të qeverisë britanike qëështë prezantuar dy vite më parë dhe ka kushtuar 4.3 milionë paund. Por vetëm tetë janë dërguar deri më tani në vendet e tyre.
Në total të paktën 1200 kriminelë shqiptarë janë në burgjet e Mbretërisë së Bashkuar.
Mes shqiptarëve të arrestuar përfshihet një përdhunues që sulmoi një 15-vjeçare në një qendër tregtare, një i dënuar që plagosi një person dhe mbretërit e drogës që vepronin në të gjithë Mbretërinë e Bashkuar. Qeveria i pagoi Shqipërisë 4.3 milionë paund për të modernizuar burgjet vendase në këmbim të pranimit të të dëbuarve, që do të thotë se secili prej kriminelëve të kthyer u ka kushtuar taksapaguesve britanikë 537,500 paund.
Si pjesë e planit u blenë 15 makina elektrike të reja të shërbimit të burgut dhe 22 mikrobusë. Skema hyri në fuqi në maj të vitit 2023, duke autorizuar largimin e të gjithë të dënuarve shqiptarë që janë në burg për më shumë se katër vjet. Pothuajse dy vjet më vonë, megjithatë, shumë nga kriminelët më të këqij të vendit ende po qëndrojnë në burgjet e mbipopulluara britanike.
Një prej tyre që është ende në Mbretërinë e Bashkuar është Koci Selamaj, i cili u dënua me 36 vite burg dhe ndodhet në spitalin psikiatrik Broadmoor për vrasjen e mësueses Sabina Nessa, 28 vjeçe, të cilën e goditi me një hekur dhe e mbyti në një park të Londrës në vitin 2021. Selamaj që atëherë është dënuar edhe me katër vite e gjysme të tjera për plagosje me thikë.
Një nga tetë kriminelët shqiptarë të ekstarduar është Klodjan Copja, 30 vjeç, një mbret i një rrjeti furnizimi me kokainë që kontrabandonte drogë me vlerë 60 milionë paund në Mbretërinë e Bashkuar. Një tjetër është Erald Mema, 40 vjeç, një shef i bandës së drogës, i cili u dënua me 25 vjet pasi u gjetën 560,000 paund para të gatshme pas shpërndarjes së tij të kokainës nëpër Midlands dhe Oxford.
Gentjan Dervishaj, 33 vjeç, u burgos për trafikun e 11 milionë paund lëndë narkotike në verilindje në një nga dërgesat më të mëdha të drogës në rajon. Elion Gllava, 29 vjeç, është deportuar gjithashtu. Ai u kap me një armë zjarri dhe rrezikoi jetën e një personi, gjatë një incidenti me përplasje me makinë në makinë në Oldham, Greater Manchester, në vitin 2021. Një person u qëllua gjatë përplasjes.
I përfshirë në të njëjtin incident dhe i ekstraduar në Shqipëri ishte edhe Andon Bita, 49 vjeç. Ai u dënua me 17 vjet për plagosje të rëndë me dashje dhe armëmbajtje pa leje.
Një tjetër që është kthyer tani në Shqipëri është Dardan Dollapaj, 25 vjeç. Ai u akuzua për tentativë vrasjeje pas një sulmi me thikë në Hounsloë High Street, në perëndim të Londrës, në vitin 2019.
Rufat Kasamaj, 38 vjeç, nga Leyton, u kthye pasi u dënua me dhjetë vjet e gjysmë për përdhunimin e një vajze 15-vjeçare në një lokal në qendrën tregtare Ëestfield të kryeqytetit.
Krimineli i tetë dhe i fundit i dëbuar deri më tani është Dolimar Sejdiu, 24 vjeç. Ai u shpall fajtor për lëndime të rënda trupore dhe plagosje në Londrë pesë vjet më parë.
Të gjithë janë tani në burgjet shqiptare, të cilat u lejojnë takime intime me partneret e tyre, një privilegj që nuk lejohet në institucionet britanike. Autoritetet shqiptare pretendojnë se 59 kriminelë të tjerë janë ende në Britaninë e Madhe në pritje të një vendimi nga gjykatat shqiptare.
Sipas Daily Mail, ato përfshijnë të paktën një vrasës, dy përdhunues dhe autorë të trafikut të drogës dhe armëve të zjarrit./ZËRI
