KORÇË- Policia zhvilloi dje një aksion antidroge ku zbuloi një magazinë më lëndë narkotike të llojit kanabis sativa në fshatin Voskop.
Deri më tani nga ky operacion kanë rënë në pranga të policisë Gentian Guri, Andon Demirshan, Anesti Burda, Redion Hamitaj. Ndërsa 3 persona të tjerë po hetohen në gjendje të lirë për moskallëzi krimi. Po ashtu është shpallur në kërkim një person tjetër, 38 vjeç nga fshati Voskop me inicialet S.D
Gjatë kontrollit në banesën e tij u gjetën të kultivuara 2 bimë narkotike, si dhe sasi të vogla të lëndëve narkotike kokainë dhe kanabis. Gjatë operacionit Policia sekuestroi 195 kilogramë kanabis në proces tharjeje, që u gjetën në ambientet e magazinës dhe pajisje që shërbenin për tharjen dhe përgatitjen e lëndës narkotike për shitje.
Gjithashtu, u sekuestruan edhe 1 armë zjarri pistoletë, një sasi kokaine, 1 leje drejtimi false, 7 celularë, 1 automjet, 1 pasaportë, 3 karta SIM dhe një shumë eurosh.
"Zbulohet një magazinë me lidhje të paligjshme të energjisë elektrike, ku thaheshin bimë narkotike dhe përgatitej lëndë narkotike për t’u shitur.
Kapen në flagrancë në ambientet e magazinës, 7 shtetas. Arrestohen pronari i magazinës dhe bashkëpunëtori i tij. Në pranga edhe 2 shtetas, si dhe në hetim 3 shtetase, për moskallëzim të krimit. Shpallet në kërkim 1 shtetas, i dyshuar i përfshirë në këtë veprimtari kriminale.
Sekuestrohen 195 kg lëndë narkotike cannabis sativa (bimë në proces tharjeje), që u gjetën në ambientet e magazinës dhe pajisje që shërbenin për tharjen dhe përgatitjen e lëndës narkotike për shitje. Sekuestrohen edhe 1 armë zjarri pistoletë, një sasi kokaine, 1 leje drejtimi false, 7 celularë, 1 automjet, 1 pasaportë, 3 karta SIM dhe një shumë eurosh.
Seksioni për Hetimin e Narkotikëve i DVP Korçë, gjatë kontrolleve intensive në territor dhe në ambiente të mbylluara, për goditjen e veprimtarive kriminale në fushën e narkotikëve, kanë siguruar informacion për përshtatjen e një ambienti për tharjen e bimëve narkotike dhe përgatitjen e lëndës narkotike për shitje. Shërbimet e Policisë, në kuadër të operacionit policor të koduar "Voskopi", kanë ndërhyrë menjëherë në ambientet e magazinës në pronësi të shtetasit A. D., në fshatin Voskop, ku kapën në flagrancë dhe arrestuan shtetasit:
A. D., 43 vjeç, banues në fshatin Voskop, për veprat penale "Prodhimi dhe shitja e narkotikëve”, kryer në bashkëpunim dhe "Vjedhja e energjisë elektrike dhe impulseve telefonike";
G. G., 43 vjeç, banues në Tiranë, për veprat penale "Prodhimi dhe shitja e narkotikëve”, kryer në bashkëpunim, "Prodhimi dhe mbajtje pa leje e armëve, armëve shpërthyese dhe municionit" dhe "Falsifikimi i dokumenteve";
A. B., 43 vjeç, banues në fshatin Bulgarec dhe R. H., 35 vjeç, banues në Cërrik, për veprën penale “Moskallëzimi i krimit”.
Gjithashtu, në ambientet e magazinës, u kapën në flagrancë 3 shtetase për të cilat nisi procedimi në gjendje të lirë, për veprën penale “Moskallëzimi i krimit”.
Në vijim të hetimeve u identifikua si i përfshirë në këtë veprimtari kriminale dhe u shpall në kërkim shtetasi S. D., 38 vjeç, banues në fshatin Voskop. Gjatë kontrollit në banesën e tij u gjetën të kultivuara 2 bimë narkotike, si dhe sasi të vogla të lëndëve narkotike kokainë dhe kanabis.
Vijon puna për kapjen e këtij shtetasi dhe për dokumentimin e plotë të kësaj veprimtarie kriminale.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Korçë, për veprime të mëtejshme", njofton Policia.
Operacioni u zhvillua dje, ku nga informacionet paraprake u raportua se u arrestuan 6 persona. Ndërsa sot në një njoftim zyrtar, policia raporton se janë arrestuar vetëm 4 persona. Gjatë operacionit policia sekuestroi rreth 60 kg kanabis sativa të bërë gati për shitje, ndërsa ka më tepër se 100 rrënjë të cilat kanë qenë me kanabis i njomë me boçe dhe kërcell. Gjithashtu në magazinë u gjet edhe një armë zjarri ndërsa dyshohet se lënda narkotike është marrë nga tjetër vend dhe është mbledhur në magazinë për t’u tharë, e më pas për t’u tregtuar. /ZËRI
