TIRANË-Pas tubimit të zhvilluar paraditen e sotme përpara Kuvendit, qytetarët janë mbledhur sërish në sheshin Skënderbej, ku po vijojnë protestën e cila shënon ditën e 31-të të saj.
Gjatë kohës që në Parlament zhvillohej seanca plenare, protestuesit u grumbulluan jashtë godinës së Kuvendit, ku pati tensione dhe përplasje me efektivët e Policisë. Pas këtyre incidenteve, ata u zhvendosën përpara Drejtorisë së Policisë së Tiranës, ku kërkuan lirimin e personave të shoqëruar gjatë protestës.
Pas përfundimit të këtyre zhvillimeve, qytetarët janë rikthyer në sheshin Skënderbej, nga ku pritet të nisin marshimin drejt Kryeministrisë, ashtu si edhe në ditët e mëparshme, për të mbajtur fjalimet e tyre. Edhe në këtë ditë të 31-të të protestës nuk mungojnë pankartat, flamujt kuqezi me shqiponjën dykrenare dhe brohoritjet e protestuesve. Protestës i janë bashkuar fëmijë, të moshuar, studentë, profesionistë, aktivistë dhe turistë.
Qytetarët vijojnë të kërkojnë plotësimin e pesë kërkesave të cilat përfshijnë dorëheqjen e panegociushme të kryeministrit Edi Rama, krijimin e një qeverie teknike dhe ndryshime kushtetuese.
