ELBASAN- Një operacion masiv antidrogë i ndërmarrë nga SPAK është zhvilluar në orët e para të mëngjesit të sotëm në qarkun e Elbasan, duke përfshirë edhe bashkitë Librazhd dhe Prrenjas, me qëllim goditjen e një rrjeti të dyshuar për trafikimin dhe shpërndarjen e lëndëve narkotike.
Operacioni i koduar “Grupi” u zhvillua nga Sektori për Hetimin e Narkotikëve dhe Trafiqeve të Paligjshme në DVP Elbasan, në drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Elbasan, dhe me mbështetjen e Forcës Kombëtare të Sigurisë, Njësia Fier.
Sipas njoftimit zyrtar, në kuadër të hetimeve janë lëshuar gjithsej 24 urdhra ndalimi, nga të cilët 16 janë ekzekutuar. Prej tyre, 8 urdhra janë zbatuar gjatë operacionit të sotëm, ndërsa 8 të tjerë ishin ekzekutuar më herët gjatë hetimit që ka zgjatur rreth një vit. Aktualisht vijon puna për kapjen e 8 personave të tjerë të shpallur në kërkim.
Gjatë aksionit të sotëm është bërë gjithashtu 1 arrestim në flagrancë për veprimtari në fushën e narkotikëve, si dhe është kapur një tjetër shtetas i shpallur në kërkim për një çështje tjetër penale.
Në kuadër të operacionit janë sekuestruar rreth 9 kilogramë kanabis, një sasi kokaine e ndarë pjesërisht në doza gati për shitje, si dhe prova të tjera materiale, përfshirë peshore elektronike, automjete dhe aparate celularë që dyshohet se përdoreshin në aktivitetin kriminal.
Njoftimi i policisë:
Finalizohet operacioni policor i koduar “Grupi”, për goditjen e aktivitetit kriminal në fushën e trafikimit dhe shpërndarjes së lëndëve narkotike në qarkun Elbasan.
Operacioni u zhvillua nga Sektori për Hetimin e Narkotikëve dhe Trafiqeve të Paligjshme në DVP Elbasan, në drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Elbasan, me mbështetjen e Forcës Kombëtare të Sigurisë, Njësia Fier.
Në kuadër të operacionit, nga Prokuroria Elbasan janë lëshuar gjithsej 24 urdhra ndalimi.
Ekzekutohen 16 urdhra ndalimi, (8 urdhra ndalimi janë ekzekutuar gjatë operacionit të sotëm dhe 8 urdhra ndalimi janë ekzekutuar gjatë periudhës hetimore njëvjeçare).
Vijon puna për lokalizimin dhe kapjen edhe të 8 shtetasve të tjerë, të cilët gjatë operacionit nuk u gjetën në banesa.
Ndërkohë, gjatë operacionit të zhvilluar ditën e sotme, është kapur edhe 1 shtetas i shpallur në kërkim dhe është arrestuar në flagrancë një shtetas tjetër për veprimtari kriminale në fushën e narkotikëve.
Sekuestrohen 9 kg lëndë e dyshuar narkotike kanabis, një pjesë e ndarë në doza gati për shitje, rreth 100 gram kokainë, një pjesë gati për shitje, 5 peshore elektronike, 7 automjete dhe 17 aparate celularë.
Strukturat për Hetimin e Narkotikëve dhe Trafiqeve të Paligjshme të DVP Elbasan, në drejtimin e Prokurorisë, pas një hetimi të ndjekur me metoda speciale prej disa muajsh, finalizuan operacionin policor të koduar “Grupi”, që kishte në fokus goditjen e shtetasve të përfshirë në trafikimin dhe shpërndarjen e lëndëve narkotike në qytetet Elbasan, Librazhd dhe Prrenjas.
Gjatë operacionit të zhvilluar mëngjesin e sotëm, u bë e mundur ekzekutimi i 8 urdhrave të ndalimit për shtetasit I. Sh., 38 vjeç; R. Z., 52 vjeç; G. Ç., 23 vjeç; A. B., 49 vjeç; N. S., 39 vjeç; L. F., 33 vjeç; J. I., 31 vjeç dhe M. Ç., 32 vjeç.
Gjithashtu, gjatë operacionit u bë arrestimi në flagrancë i shtetasit R. H., 39 vjeç, si dhe u kap shtetasi në kërkim P. Q., 54 vjeç, i shpallur në kërkim nga Gjykata e Shkallës së Parë e Juridiksionit të Përgjithshëm Durrës për veprën penale “Menaxhimi i mbetjeve”, kryer në bashkëpunim.
Gjithashtu, u ekzekutuan 27 vendime të Gjykatës për kontrolle banesash dhe ambientesh të ndryshme.
Strukturat e Hetimit të DVP Elbasan, nën drejtimin e Prokurorisë Elbasan, vijojnë punën për dokumentimin e plotë ligjor të kësaj veprimtarie kriminale, si dhe për kapjen e shtetasve të shpallur në kërkim.
Materialet i kaluan Prokurorisë, për veprime të mëtejshme./ZËRI
