TIRANË- Edhe Autoriteti i Kontrollit të Ushqimit është në lupë nga Prokuroria e Tiranës. Procedura e ndjekur nga punonjësit e AKU-së për të bërë analizat e mishit me salmonelë të futur në Shqipëri nga Brazili janë duke u hetuar për të kuptuar nëse reagimi është bërë në kohë; apo janë shkak për shpërndarjen e mishit të kontaminuar ka qenë neglizhenca. Kjo pasi ka dyshime se analizat mund të mos jenë kryer konform parashikimeve ligjore.
Ndaj Prokuroria e Tiranës ka regjistruar procedim penal për dy vepra penale, atë të "shpërdorimit të detyrës" dhe "importimi, prodhimi, shitja dhe ruajtja e ushqimeve të rrezikshme për shëndetin dhe jetën e njerëzve". Po ashtu, dje, ministrja e Bujqësisë, Anila Denaj lajmëroi se po konsiderohet edhe mundësia e shkrirjes së AKU-së. Por nuk dha detaje të tjera.
-
Skandali me mishin e pulës/ Anila Denaj: AKU do të shkrihet!
1 Prill, 14:50
Sa i përket mishit të pulës me salmonelë, nga kontrollet e kryera në qytetin e Vlorës është sekuestruar 500 kg mish pule me salmonelë; në dy fast-food-e, tre markete dhe në një restorant. Por janë marrë mostra për analizim edhe në subjekte të tjerë, për të cilët pritet përgjigje.
Për të gjithë ata që e kanë konsumuar mishin e kontaminuar ka folur drejtori i menaxhimit të riskut në AKU, Martin Jorgaqi. I ftuar në studion e “Ditarit” në A2 CNN, Jorgaqi deklaroi se nga mishi i pulës me salmonelë që ka hyrë në vendin tonë nuk ka raste të shtrimeve në spitale. Por nuk e tregoi burimin e këtij informacioni, pasi nga ana e spitaleve në Shqipëri nuk ka asnjë njoftim zyrtar lidhur me informacionet për të shtruarit.
“Sasia e përgjithshme ka qenë 27 ton me një prej dy salmonelave më të rrezikshme që njihen. Arritëm që të kthenim një masë të konsiderueshme të këtij produkti. Kemi kthyer më shumë se 50% të 7,9 ton të këtij produkti. Subjekti që e ka sjellë e ka nxjerrë këtë produkt në treg, me të drejtë apo jo, këtë nuk di ta them sepse po hetohet çështja, por AKU ka bërë të mundur të gjejë se ku është shpërndarë produkti. Për të gjithë sasinë që po flasim, që ka 10 ditë që ka hyrë, sot spitalet duhet të ishin plot sepse salmonela i jep problemet për 2-4 ditë. Ne nuk kemi asnjë në spital, kemi vetëm zhurmën mediatike. Shpërthimi është kur njerëzit hanë të njëjtin produkt dhe sëmuren,”- tha Jorgaqi.
27 ton mish pule me salmonelë u importuan këtë muaj nga Brazili në vendin tonë. Mishi me salmonelë është futur në vendin tonë nga Brazili dhe është shpërndarë në treg nga kompania “diMal”. Sipas analizave të kryera në ISUV, u zbulua se mishi ishte infektuar me "Salmonella Typhimurium", por që në këtë kohë, mishi ishte shitur. Gjithsej, nga 27 ton, janë shitur 13.5 mijë kilogramë; shumica në qarkun e Kukësit, ndërsa pjesa tjetër është shpërndarë nëpër marketet e gjithë vendit. Në lidhje me rastin në kërkim është shpallur Arben Goxha, administratori i kompanisë, ndërsa në hetim është i vëllai, Mond Goxha, pronar i 'dimal' dhe 3 inspektorët e AKU-së, Gezim Hushi, Sada Lufta, Aldo Sinjari./ZËRI
