DURRËS- Ajo që u tregua si një shembull se humanizim ende nuk ka vdekur, duket se është krejt e kundërta. Historia e çiftit irlandez që u dha se kishin dorëzuar në Polici shumën e 41 mijë eurove që pretendonin se i kishin gjetur, është krejt e kundërta. Në fakt i kishin vjedhur. Kevin Stack, 42 vjeç, dhe partnerja e tij Kate Connolly, dorëzuan një shumë prej 41,400 eurosh, që çifti dorëzoi në Policinë e Shkodrës, duke pretenduar se e kishin gjetur më 26 mars në Durrës.
Por, nga ana e Policisë u zbulua se në fakt ishte një rast vjedhjeje, pasi nga kamerat e sigurisë çifti irlandez dallohet teksa iu merr çantën me para dy djemve të rinj. Dyshohet se paratë u përkisnin dy punëtorëve të një agjencie imobilare, të cilëve u kishte humbur çanta teksa futeshin në makinë. Pasi ata janë larguar, dy djem të mitur që po kalonin aty i kanë parë dhe i marrin paratë, por në ato momenti u afrohet çifti irlandez. Teksa panë çantën, u thanë se ishte e tyre dhe si shpërblim u dhanë 500 euro. Më pas, me të marrë çantën u nisën në drejtim të Malit të Zi.
Paralelisht Policia po hetonte rastin dhe nga kamerat e sigurisë zbuloi gjithë dinamikën e ngjarjes. Ndërsa çifti, kur kuptuan se ishin zbuluar, vendosën që të kthenin paratë e gjetura për t'i dorëzuar në Policinë e Shkodrës. Shumë larg nga Durrësi, aty ku i gjetën paratë.
Kështu, sot, burrë e grua kanë dalë në gjyq! Gjyqtarja Suela Xhani ka dhënë si masë sigurie “arrest në burg” për burrin dhe masë alternative për bashkëshorten. Connolly do të qëndrojë në burg dhe ka kohë që të paguajë garanci 5 mijë euro brenda pesë ditësh për të ndryshuar masën e sigurisë. Nëse jep garancinë pasurore, ajo duhet të paraqitet në Policinë Gjyqësore çdo dy herë në muaj deri në përfundimin e hetimeve./ZËRI
