GJERMANI-Sammy Miri, bosi i klanit të rrezikshëm "Miri", ka dalë në gjyq në Gjermani. Miri mbërriti në gjykatë nën masa të rrepta sigurie. Atij i ishin vendosur kufje dhe sytë i ishin mbuluar, raporton BILD. 38-vjeçari shoqërohej nga forca të shumta speciale të policisë dhe mjete të blinduara.
Ai akuzohet për trafikim të sasive të mëdha të drogës. Miri thuhet se ka tregtuar kokainë me vlerë rreth një milion euro Gjatë procesit gjyqësor, ai pranoi se shiste kokainë, por tha se e bëri këtë pas presionit të një bande shqiptarësh. Miri tha se shqiptarët i kishin kërkuar që të paguante borxhin e vëllait. Për të shlyer këtë borxh, shqiptarët i kishin propozuar që t'u blinte kokainë dhe ta shiste.
Më 16 mars 2024, ai u arrestua në Turqi, ku deri atëherë bënte një jetë luksi. Në verë ai u ekstradua në Gjermani. Hetimi filloi në vitin 2020 pasi specialistët francezë arritën në komunikimet EncroChat të klanit. U zbuluan 40,000 mesazhe në të cilat banda komunikonte hapur për marrëveshjet e tyre. Dy vëllezërit e kreut të klanit tashmë janë dënuar me gjithsej 14 vite burg secili dhe një vëlla i tretë është në arrati. Sipas prokurorit publik Henner Kruse, një dënim me burg prej "jo më pak se pesë vjet" ka të ngjarë për Sammy Miri. Mund të jetë e mundur edhe deri në 15 vjet burg.
Në një intervistë për BILD nga Turqia , Sammy Miri kritikoi faktin se gjyqësori donte të “bënte shembull” kundër të ashtuquajturit krim klanor. Ai tha: “Goli shpesh tejkalohet. Kam ndjesinë se autoritetet po përdorin çdo mjet të mundshëm kundër familjes sonë dhe po i kalojnë edhe kufijtë e shtetit të së drejtës”.
Vëllai i Mirit është dënuar me 14 vite burg, ndërsa Miri rrezikon edhe një dënim të gjatë. Vendimi pritet të merret 21 mars të këtij viti./ZËRI
