VLORË-Një 19-vjeçar, i cili qarkullonte me armë zjarri në makinë është arrestuar gjatë një operacioni policor në qytetin e Vlorës. Në pranga është vendosur Panajot Kola, ndërsa u arrestuar edhe drejtuesi i automjetit, 34 vjeç për moskallëzim krimi.
Automjeti tip “Mercedes Benz” me të cilin lëviznin dy të rinjtë, u ndalua për kontroll nga Policia në aksin rrugor “Orikum-Vlorë” në Radhimë. Në momentin e ndalimit 19-vjeçari, i cili ishte pasagjer ka hedhur nga automjeti çantën ku mbane armën e zjarrit dhe ka tentuar të largohet me vrap, por është kapur menjëherë nga shërbimet e Policisë.
Njoftimi i policisë:
Finalizohet operacioni policor i koduar “Nightfall”, për goditjen e një rasti të armëmbajtjes pa leje.
Qarkullonte me armë zjarri pistoletë me silenciator, në automjet, kapet në flagrancë dhe vihet në pranga 19-vjeçari.
Vihet në pranga dhe drejtuesi i automjetit, për moskallëzim krimi.
Sekuestrohet arma e zjarrit.
Në vijim të punës për parandalimin dhe goditjen e veprimtarisë kriminale të armëmbajtjes pa leje, Sektori për Hetimin e Krimeve të Rënda i DVP Vlorë, në bashkëpunim me Seksionin për Mbështetjen Operacionale të Hetimit, bazuar në informacionet e siguruara në rrugë operative, organizuan dhe finalizuan operacionin policor të koduar “Nightfall”.
Gjatë këtij operacioni, në mbrëmje, në aksin rrugor “Orikum-Vlorë”, në Radhimë, është ndaluar për kontroll një automjet tip “Mercedes Benz” me të cilin qarkullonin 2 shtetas. Në momentin e ndërhyrjes së Policisë, pasagjeri ka hedhur nga automjeti një çantë dhe ka tentuar të largohet me vrap, por është kapur menjëherë nga shërbimet e Policisë.
Gjatë kontrollit në çantën marsup, u gjet një armë zjarri pistoletë me silenciator, e cila u sekuestrua në cilësinë e provës materiale.
Në përfundim të veprimeve, specialistët për Hetimin e Krimeve të Komisariatit të Policisë Vlorë arrestuan në flagrancë shtetasit:
P. K., 19 vjeç, banues në Orikum, për veprën penale “Mbajtja pa leje dhe prodhimi i armëve, armëve shpërthyese dhe i municionit”;
B. K., 34 vjeç, banues në Orikum, për veprën penale “Moskallëzim i krimit”.
Në drejtimin e Prokurorisë, vijojnë hetimet për rastin. Materialet procedurale iu referuan Prokurorisë, për veprime të mëtejshme./ZËRI
