SARANDË- Një shpërthim me tritol ka ndodhur mesnatën e kaluar në lagjen nr.3 në qytetin e Sarandës. Një automjeti të parkuar iu vendos eksploziv, duke e hedhur në erë. Si pasojë e shpërthimit, automjeti është përfshirë i gjithi nga flakët, por fatmirësisht nuk ka pasur asnjë person të lënduar.
Sipas të dhënave paraprake dyshohet se eksplozivi në mjet është vendosur për hakmarrje, pasi është në pronësi të Klaus Jaçaj 31-vjeç, i shpallur në kërkim nga Policia e Shtetit vetëm 4 ditë më parë për një plagosje të dyfishtë në Sarandë. Jaçaj akuzohet për përkrahje të autorëve të krimit, pasi ka ndihmuar dy autorët Ramadan dhe Erjon Canaj, të cilët qëlluan 2 të rinj pas sherrit për pronën në bregdet.
Sarandë/Informacion paraprak
Më datë 21.07.2025, reth orës 23:50, në lagjen nr. 3, Sarandë, dyshohet se ka shpërthyer një sasi lënde eksplozive e vendosur në një automjet, ku janë shkaktuar vetëm dëme materiale. Automjeti rezulton në pronësi të shtetasit K. J., 31 vjeç, person i shpallur në kërkim për veprën penale “Përkrahja e autorit të krimit”, në lidhje me ngjarjen e datës 17.07.2025, ku mbetën të plagosur me armë zjarri dy shtetas.Grupi hetimor ndodhet në vendngjarje dhe po punon për identifikimin dhe kapjen e autorit, zbardhjen e plotë të rrethanave të ngjarjes dhe dokumentimin e saj ligjor.
Nga data 17 korrik kur edhe ndodhi plagosja, ai është shpallur në kërkim. Ndaj edhe hakmarrja mbetet pista kryesore.
Ndërkohë forcat RENEA kanë ‘zbarkuar’ mëngjesin e kësaj të martë në Sarandë dhe po ushtrojnë kontrolle në të gjithë qytetin që javën e fundit ka pasur një sërë ngjarjes. Por ende nuk ka asnjë njoftim zyrtar./ZËRI
