TIRANË- Dosja hetimore e siguruar nga ZËRI ka zbuluar detaje të tjera nga rrjeti kriminal i grupeve të drejtuara nga Eldi Dizdari, Dritan Gjika e Armando Pacanit, me furnitor dhe një rol kryesor të Salvatore Aliu.
Nga bisedat rezulton se organizata nuk merrej vetëm me transportimin e drogës, por kontrollonte çdo hallkë të zinxhirit kriminal, nga sigurimi i kokainës në Amerikën Latine, futja e saj në konteinerë, transporti drejt porteve europiane, nxjerrja e ngarkesave dhe shpërndarja në tregjet e Bashkimit Europian. Madje edhe me transaksionin e parave.
Për SPAK-un, kjo tregon një nivel të lartë organizimi dhe eksperiencë në trafikun ndërkombëtar të narkotikëve.
Dosja nxjerr në pah edhe vëllezërit Jetmir dhe Aleks Pepaj, të cilët dyshohet se përbëjnë një nga hallkat kryesore financiare të organizatës, të përfshirë në qarkullimin e shumave të mëdha të parave.
Bashkëpunimi dhe organizmi për kokainën:
Vëllezërit Pepaj rezultojnë se kanë bashkëpunuar me Salvatore Aliun në organizimin e dërgesave me kokainë nga Ekuadori drejt porteve evropiane. Aleks Pepaj gjatë asaj periudhe ka patur dalje të sigurtë në portet e Anversit e Rotterdamit, si dhe akses në disa porte të tjera falë bashkëpunimit me lidhje të paidentifikuara deri aktualisht, kryesisht të huaj/maroken. Aleks Pepaj ka patur akses në punonjës të paidentifikuar të kompanive ndërkombëtare të transportit si Maersk e Msc, të cilët i mundësonin atij informacion mbi kontejnerë, rrugë kalimi, ndërrim terminalesh etj. Aleks Repaj identifikohet se gjatë asaj
periudhe, dyshohet se ka drejtuar rrjetin e tij nga Dubai.
Pas magazinimit në vende të sigurta, Aleks Pepaj dhe grupi i tij bënte të mundur ndarjen e shitjen me shumicë të kokainës sipas porosive, ku 10 - 12.5% të sasisë të trafikuar ishte e destinuar për personat që kishin ndihmuar Pepën për të bërë daljen e sigurtë të kokainës nga porti.
Sipas dosjes së siguruar nga ZËRI, evidentohet se këta shtetas kanë patur marrëdhënie të hershme, prej më shumë se 10 vitesh me njëri-tjetrin, duke e përmendur shpeshherë si fakt, sa herë kishin mosmarrëveshje me njëri tjetrin.
Mësohet se i hetuari Aleks Pepaj, i ka dërguar të hetuarit Salvatore Aliut miliona euro në vende të ndryshme, e kryesisht në Ekuador e Shqipëri, si pagesa për tonelatat me kokainë që Salvatore Aliu ka dërguar drejt Evropës.
Bashkëpunimi në transaksione:
Gjithashtu, i hetuari Jetmir Pepaj është i përfshirë edhe në transaksionet e parave të kokainës tek Salvatore Aliu në Ekuador e Kolumbi apo tek vëllai i tij Isa Aliu në Shqipëri. Vazhdimisht Jetmir Pepaj identifikohet të njoftojë Salvatore Aliun për paratë të cilat i ka gati për dorëzim.
Takimi te 'Plaza':
I hetuari Salvatore Aliu, më datë 04.11.2020, Salvatore Aliu krijon një grup chat me Jetmir Pepajn (BOONCU) dhe Isa Aliun (L4O0JU). Ky i fundit është nisur nga Elbasani në drejtim të Tiranës, sipas porosisë së vëllait të tij të hetuarit Salvatore Aliu, me qëllim që të takoj Jetmir Pepajn, i cili do t'i dorëzonte 1 milion euro tro cash. Dorëzimi i parave është bërë në garazhdin e hotel "Plaza" në Tiranë nga ana e një personi të paidentifikuar (i cili përmendet si nipi nga ana e Jetmir Pepës), edhe pse Jetmir Pepa këmbëngulte që Isai të futej në hotelin e tij "Oxford', pasi do të ishte me i sigurtë, por Isai e ka patur te
pamundur te shkonte te hotel "Oxford" pasi nuk kishte ku te linte makinen e tij Porche.
E njëjta lëvizje është realizuar edhe me datë 08.11.2020, ku Isa Aliu ka marrë nga Pepajt 200.000 euro./ZËRI
