TIRANË- Drejtori i Fondacioni Shqiptaro-Amerikan për Zhvillim (AADF), Martin Mata ka njoftuar hapjen e tenderit për Parkun Kombëtar të Butrintit, teksa ajo që bie në sy është fjalia me të cilën ka zgjedhur të bëjë me dije anoncimin. "Apliko po ta mbajti", është kjo fjalia që njofton hapjen e aplikimeve për tenderin e radhës, ndërsa studiuesi Auron Tare e ka cilësuar arrogancë karshi Butrintit. Sipas tij, vetëm një karagjoz mund ta bëjë këtë postim duke treguar injorancën e tij, teksa nxit reagimin e opinionit publik, duke vënë në dukje se një gjë e tillë nuk ndodh kurrsesi me Akropolin e Athinës apo me Koloseun e Romës.
Studiuesi Tare, i cili dhe më parë ka folur për problemet sipas tij në menaxhimin e ri të Butrintit, ngriti shqetësimin e tij në lidhje me tenderin prej 50 mijë dollarësh, duke theksuar se Butrinti është një trashëgimi kombëtare e jashtëzakonshme. Një pasuri e tij, sipas Tares, nuk duhet të trajtohet si një markë për promocim politik apo fasadë./ZËRI/
