TIRANË- Shoqërimi i xhaxhait të kandidates për deputete të Partisë Demokratike në Fier, Silva Hasaj ka sjellë përplasje mes Policisë së Shtetit dhe kreut të grupit parlamentar të PD-së, Gazment Bardhi.
Bardhi, përmes një postimi në rrjetet sociale hodhi akuza se po ushtrohet presion ndaj familjarëve të kandidates Hasaj, konkretisht xhaxhait të saj, Agim Hasaj. Sipas Bardhit, Policia e Shtetit po përdoret si instrument politik nga kryeministri Edi Rama dhe përbën një kërcënim serioz ndaj demokracisë dhe stabilitetit në vend. Demokrati i ka bërë thirrje institucioneve ndërkombëtare të monitorojnë Policinë e Shtetit gjatë procesit zgjedhor. Pas pretendimeve të Bardhit, ka ardhur edhe një sqarim nga ana e Policisë së Fierit në të cilin bëhet me dije se 59-vjeçari Agim Hasaj është shoqëruar pasi i është gjetur një bllok me shënime në lidhje me zgjedhjet. Policia sqaron se pasi i kanë marrë deklarimin, e kanë lënë të lirë dhe të gjitha materialet janë referuar në Prokurorinë e Fierit.
