TIRANË- SPAK ka përfunduar hetimet për ish-ministrin e Shëndetësisë, Ilir Beqaj për abuzimin me fondet e Agjencisë Shtetërore të Programimit Strategjik dhe Koordinimit të Ndihmës (SASPAC). Në një njoftim zyrtar, bëhet me dije se SPAK ka dërguar për gjykim dosjen me 11 pandehur, mes tyre ish-ministri Beqaj dhe ortaku i tij, Ermal Kurtulaj. Struktura e Posaçme kundër Korrupsionit dhe Krimit të Organizuar ka dalë në përfundimin se Ilir Beqaj ka pasur njohje me të pandehurin Ermal Kurtulaj, të paktën që prej vitit 2012 dhe se veprimet me fitime të parregullta të të dyve janë provuar në të paktën dy raste, por ka dyshime edhe për 9 raste të tjera.
Sipas SPAK, gjatë ushtrimit të detyrës si Drejtor i Përgjithshëm i SASPAC-ut, Ilir Beqaj ka vepruar si urdhërues, kurse Ermal Kurtulaj, si zbatues dhe të dy bashkë përgjatë viteve 2022-2023 kanë kryer procedura prokurimi fiktive. Prokuroria e Posaçme shprehet se asnjë nga shërbimet e prokuruara në kuadër të eventeve që organizonte SASPAC përgjatë vitit 2023 nuk i janë nënshtruar asnjë procedure prokurimi të rregullt. Në çdo rast fituesi është dakordësuar dhe përcaktuar shumë më përpara se të realizohet procedura e prokurimit. Në fund të njoftimit zyrtar, SPAK bën me dije se hetimet vazhdojnë edhe për të faktuar vepra të tjera penale që janë zbuluar gjatë hetimit për fondet e SASPAC.
