BRAZIL – Sensacionali 17-vjeçar Endrick është thirrur në skuadrën e Brazilit për herë të parë, ndërsa Fernando Diniz gjithashtu dërgoi ftesat e para për Joao Pedron, Paulinhon dhe Pepe për ndeshjet kualifikuese për Kupën e Botës 2026, kundër Kolumbisë dhe Argjentinës.
Richarlison, që ka luajtur rregullisht për një kohë të gjatë, nuk u thirr. Lojtarët si Danilo, Eder Militao, Casemiro dhe Neymar, janë jashtë fushe, pasi janë lënduar.
Endrick, i cili do t'i bashkohet Real Madridit vitin e ardhshëm, ka shënuar tre gola në dy paraqitjet e tij të fundit për Palmeiras. Ai u bë lojtari më i ri që mori një telefonatë nga Brazili për të përfaqësuar Kombëtaren. Vetëm Ronaldo fenomeni kishte marrë telefonatë në këtë moshë që të bashkohet me Kombëtaren e Brazilit.
“Në rastin e Endrick, ai është një lojtar që ka potencialin të bëhet një legjendë e ekipit. Djali ka lindur në vitin 2006. E kam parë të luajë për një kohë të gjatë. Dhe pikërisht në këtë moment, ai është në formën e tij më të mirë”, tha Diniz.
Paulinho, 23 vjeç, ka shënuar pesë gola në tre ndeshjet e tij të fundit për Atletico Mineiro, dhe është golashënuesi më i mirë në kampionatin brazilian, së bashku me Tiquinho Soares. Sulmuesi ndihmoi Brazilin të fitonte medaljen olimpike dy vjet më parë.
“Paulinho është një lojtar që më pëlqen shumë”, tha Diniz. “Ai është në formë vërtet të veçantë. Paulinho është një lojtar që ka një stil loje që besoj se përshtatet me mënyrën se si unë e shoh lojën e futbollit. Ai është një sulmues, mund të operojë në të dy krahët”, u shpreh trajneri brazilian.
Diniz zgjodhi futbollistët që do luajnë për Brazilin në kualifikueset e Botërorit 2026, vetëm dy ditë pasi udhëhoqi Fluminensen drejt fitores së Kupës Libertatores. Nino dhe Andre, të cilët ndihmuan Fluminensen të mposhtte Boca Juniors në finale, ishin në listën e tij. Mungesa më befasuese ishte Richarlison, i cili ka luajtur në të katër ndeshjet e Brazilit nën drejtimin e Diniz, duke startuar në tre prej tyre.
“Richarlison është një lojtar i shkëlqyer. Ai luajti shumë mirë në kompeticionin më të madh në botë, që është Kupa e Botës. Thjesht ai së fundmi nuk ka dhënë maksimumin e tij, por nuk po luan keq. Në këtë moment, unë preferoj të thërras të tjerët”, u shpreh trajneri.
Brazili do të përballet me Kolumbinë në Baranquilla të enjten, 16 tetor përpara se të presë Argjentinën në Maracana pesë ditë më vonë.
Brazilianët janë të tretët në kualifikueset e Amerikës së Jugut, pasi kanë marrë shtatë pikë nga 12 të mundshme. Gjashtë ekipet më të mira do të arrijnë automatikisht në Kupën e Botës FIFA 26, ndërsa vendi i shtatë do të shkojë në Play-Off./Zëri.ai/
