TIRANË- Vala e të nxehtit që ka pushtuar prej disa ditësh vendin, dhe pritet të vazhdojë edhe gjatë javës së ardhshme, ka sjellë pasojat e para në rritjen e urgjencave shëndetësore.
Në javën e fundit janë shtuar rastet e infarkteve, problemet e tjera kardiake dhe një sërë shqetësimesh shëndetësore në popullatë.
Skënder Brataj tregon se vetëm javën e fundit 10 mijë qytetarë kanë kërkuar ndihmën e Urgjencës Kombëtare për shqetësime të shkaktuara nga vapa. Më së shumti janë humbje ndjenjash nga i nxehti përvëlues, por dhe probleme kardiake tek pacientët kronikë.
Rritje të vizitave mjekësore raportohet edhe nga 34 qendrat shëndetësore verore, ku 27% të fluksit e zënë turistët e huaj. Shqetësimet janë nga më të ndryshmet thotë Doktor Brataj, ku krahas virozave të stinës në qarkullim është dhe Covid me shenjat e tij karakteristike.
Në këtë valë të nxehti që duket se do të zgjasë mjekët këshillojnë të gjitha grup-moshat të reduktojnë lëvizjet në orët e pikut, të qëndrojnë në ambiente të freskëta duke konsumuar sa më shumë lëngje.
