ITALI- Konfirmimi i pozitivitetit nga kundëranaliza e Paul Pogba çoi në një pasojë të parë, të menjëhershme. Juventusi, përmes një letre dërguar lojtarit, e ka njoftuar për pezullimin e pagës aktuale.
Sipas rregulloreve, bardhezinjtë nga sot e tutje dhe për të gjithë periudhën e pezullimit do t’i paguajnë Pogba vetëm minimumin federal. Me kushtin që, në javët në vijim, Juventusi të mos vendosë të vazhdojë me zgjidhjen e kontratës.
Pogba, si në rastin e të gjithë futbollistëve që tashmë kanë mbushur moshën 24 vjeç, do të fitojë 42.477 euro bruto në sezon, e barabartë me afërsisht 2 mijë euro në muaj. Ky është, siç u përmend, minimumi i vendosur nga rregullorja federale për raste të ngjashme me atë të francezit, që aktualisht është pezulluar nga Gjykata Kombëtare Antidoping pas testit pozitiv të gjetur në fundin e ndeshjes Udinese-Juventus.
Për momentin, klubi bardhezi dëshiron të presë lëvizjet e Pogba dhe avokatëve të tij, por nuk përjashtohet që të vazhdojë me ndërprerjen e kontratës, që ende e lidh francezin me Juventusin deri më 30 qershor 2026.
Por çfarë thotë rregullorja në këtë drejtim? “Në rast skualifikimi për doping, ulja e shpërblimit, si alternativë ndaj zgjidhjes së kontratës, mund të jetë e barabartë me të gjithë shpërblimin, fiks dhe të ndryshueshëm, për periudhën e kohëzgjatjes së skualifikimit, duke filluar nga pezullimi paraprak nga organet e drejtësisë sportive”.
Për më tepër, klubi “mund të urdhërojë përkohësisht dhe drejtpërdrejt përjashtimin nga përgatitja dhe/ose nga seancat e mësipërme stërvitore, me kusht që në të njëjtën kohë t’i përcjellë lojtarit, me procedurë të përshpejtuar, propozimin përkatës për vendosjen e sanksionit”.
Ndërsa “lojtari mund të kërkojë rivendosjen dhe/ose zgjidhjen e kontratës”. Detyrimi për pagesën e shpërblimit, si në pjesën fikse, ashtu edhe atë të ndryshueshme, nga klubet pezullohet me njoftim duke filluar nga data e hyrjes në fuqi e njërës prej dy rrethanave të mëposhtme dhe për të gjithë kohëzgjatjen e tij:
– Nëse lojtari iu është nënshtruar masave disiplinore që ndalojnë aktivitetin sportiv si rezultat i sanksioneve në lidhje me shkeljet sportive, ndalimeve të basteve dhe praktikave të dopingut, si dhe në rastet e mosdisponueshmërisë së lojtarit si rezultat i masave, qoftë edhe të përkohshme, të urdhëruara nga autoriteti gjyqësor.
– Nëse lojtari nuk është i disponueshëm për tri thirrje stërvitore ose ndeshje të paktën 48 orë larg njëra-tjetrës brenda një periudhe prej të paktën 7 ditësh.
Paul Pogba nënshkroi me Juventusin në verën e vitit 2022 deri më 30 qershor 2026 dhe merr 8 milionë euro neto me përfitimet e Dekretit të Rritjes. Paga bruto e francezit është rreth 10.48 milionë euro në sezon, me një peshë të përgjithshme buxhetore prej rreth 11.1 milionë euro, përfshirë kostot ndihmëse të shpërndara deri në vitin 2026.
