TIRANË- Aktorja Elia Zaharia është rikthyer në skenë, pas problemeve në jetën e saj familjare. Ajo ka qenë pjesë e shfaqjes ‘Para Perëndimit’, që u vu në skenë në Teatrin e Metropolit.
“Para Perëndimit” vë në sfond katastrofën familjare në një botë të trazuar, ndërsa në skenë përveç Elias është ngjitur dhe nëna e saj, aktorja Yllka Mujo.
Drama e nobelistit Gerhart Hauptmann, na jep një mundësi për të shqyrtuar vendin e individit në botën bashkëkohore. A janë zgjedhjet e tij të lira apo të kontrolluara?
“Para Perëndimit” përqendrohet në dramën e “mungesës së lirisë” me të cilën përballet 70-vjeçari Matthais Clausen.
Tre vite pas vdekjes së gruas së tij, ai bie në dashuri me një vajzë të re Inken, por që pengohet nga të gjitha anët prej atyre që e rrethojnë, mbi të gjitha familja e tij që e sheh këtë histori dashurie si kërcënim të trashëgimisë financiare dhe shpirtërore të familjes.
Regjia e shfaqjes është nga Xhunga Çobani, ndërsa interpretojnë aktorët Alfred Trebicka, Ilirda Bejleri, Elia Zaharia, Yllka Mujo, Sokol Angjeli, Alex Seitaj, Luli Bitri, Alert Çeloaliaj, Pjerin Vlashi, Vasjan Lami, Klesta Shero, Roerd Toçe, Ligoraq Riza, Genc Fuga, Elona Hyseni, Kastriot Ramollari, Artur Vera, Laura Hoxha, Megi Duka, Maringlen Domi, Xhoni Spahi, Adela Gjyla.
/ZËRI
