SARANDË- Një ngjarje e rëndë ka ndodhur gjatë një ndeshjeje miqësore, ku humbi jetën ish-futbollisti veteran, Fredi Mërkuri. Ngjarja ka ndodhur pasditen e sotme, ku në stadiumin "Andon Lapa" në Sarandë, po luhej një ndeshje mes futbollistëve veteranë shqiptarë dhe atyre grekë. Për arsye që nuk dihen, portieri veteran i skuadrës "Butrinti" nuk është ndjere mirë dhe në një moment është shembur në tokë. Edhe pse është transportuar me urgjencë drejt spitalit të qytetit, fatkeqësisht nuk ka arritur të mbijetojë.
Policia e Shtetit, në një njoftim zyrtar lidhur me ngjarjen, bën me dije se 62-vjeçari ka ndërruar jetë për shkaqe natyrale. Por detaje të tjera nuk janë bërë me dije.
Sarandë/Informacion paraprak
Rreth orës 18:10, në stadiumin “Andon Lapa”, duke luajtur gjatë një ndeshjeje miqësore futbolli, ka humbur jetën, dyshohet për shkaqe natyrale, shtetasi F. M., 62 vjeç, ish-futbollist. Grupi hetimor ndodhet në vendngjarje dhe po punon për sqarimin e rrethanave të ngjarjes.
Fredi Mërkuri është konsideruar si ikonat e klubit të Butrintit në Sarandë, pasi e vazhdoi pasionin e tij edhe duke trajneruar të rinjtë./ZËRI
