SHBA - Laurence Faucett, njeriu i dytë që mori një transplant zemre nga një derr i modifikuar gjenetikisht, vdiq gjashtë javë pas procedurës eksperimentale.
Qendra Mjekësore e Universitetit të Maryland (UMMC), ku u krye procedura eksperimentale, tha se zemra filloi të shfaqte shenja refuzimi ditët e fundit.
“Dëshira e fundit e Faucett ishte që ne të përfitojmë sa më shumë nga ajo që kemi mësuar nga përvoja jonë për të siguruar që të tjerët të kenë mundësinë për një zemër të re, kur një organ njerëzor nuk është i disponueshëm.
Më pas ai i tha ekipit të mjekëve dhe infermierëve të mbledhur rreth tij se na donte. Do të na mungojë tmerrësisht ai”, tha Dr. Bartley Griffith, drejtor klinik i Programit të Xenotransplantimit Kardiak në Shkollën e Mjekësisë të Universitetit të Maryland.
Sipas CNN, Faucett, 58 vjeç, u pranua për herë të parë në këtë qendër spitalore më 14 shtator, pasi përjetoi simptoma të dështimit të zemrës dhe iu nënshtrua transplantit eksperimental gjashtë ditë më vonë. Sëmundja e tij e zemrës dhe kushtet mjekësore para-ekzistuese e bënë atë të papërshtatshëm për të qenë marrës i një zemre njerëzore.
“E vetmja shpresë e vërtetë që më ka mbetur është të zgjedh zemrën e derrit, ksenotransplantin”, kishte thënë Faucett në spital në një intervistë disa ditë para operacionit. "Ne nuk kemi asnjë shpresë tjetër përveçse të shpresojmë për më shumë kohë së bashku," tha gruaja e tij Ann, në atë kohë. "Mund të jetë aq e thjeshtë sa të ulemi në verandë dhe të pimë kafe së bashku", shtoi ajo.
Në javët menjëherë pas transplantimit, mjekët thanë se besonin se funksioni i tij i zemrës ishte i shkëlqyer dhe kishin siguruar të gjitha medikamentet për ta mbështetur atë. "Ne nuk kemi asnjë provë të infeksionit dhe asnjë provë refuzimi në këtë kohë", tha Griffith.
Mjekët i kishin dhënë Faucett një trajtim eksperimental me antitrupa për të shtypur më tej sistemin imunitar dhe për të parandaluar refuzimin. Sidoqoftë, refuzimi i organeve është sfida më e rëndësishme me transplantet tradicionale, që përfshijnë organe njerëzore.
Nga ana e saj, gruaja e tij Faucett falënderoi ata që janë përfshirë në kujdesin e tij. “Larry e filloi këtë udhëtim me një mendje të hapur dhe besim të plotë te Dr. Griffiths dhe stafi i tij. Ai e dinte se koha e tij me ne ishte e shkurtër dhe ky ishte shansi i tij i fundit për të bërë diçka për të tjerët", tha ajo.
Sipas qeverisë federale të SHBA-së, janë më shumë se 113000 njerëz në listën e transplantit të organeve, duke përfshirë më shumë se 3300 persona, që kanë nevojë për një zemër.
Në janar 2022, Universiteti i Maryland-it kreu edhe operacionin e parë të tillë eksperimental ndaj 57-vjeçarit David Bennett, i cili vdiq dy muaj pas operacionit. Ndërsa nuk kishte prova të refuzimit në javët e para pas transplantimit, një autopsi arriti në përfundimin se Bennett përfundimisht vdiq nga dështimi i zemrës nga "një seri komplekse faktorësh", duke përfshirë gjendjen e tij para operacionit./Zëri.ai/
