PORTUGALI- Ylli portugez Cristiano Ronaldo, ka hedhur hije dyshime mbi ikonat e futbollit botëror, përfshirë dhe legjendën brazilian Pele. Gjatë një bisede në kanalin e tij në YouTube me Rio Ferdinand për të kaluarën dhe të ardhmen e tij të afërt, ylli portugez “hapi barkun”. CR7, gjatë kësaj bisede me ish-shokun e tij të skuadrës, donte t’iu dërgonte një mesazh disa ikonave të lojës më të famshme në botë.
Pesë herë fituesi i “Topit të Artë” arriti kuotën e 899 golave në karrierë, pasi shënoi nga goditja e dënimit për Al-Nassr të martën, por nuk ka gjasa të arrijë Pele, i cili konsiderohet golashënuesi më i mirë i të gjitha kohërave.
FIFA e vlerëson legjendën braziliane të futbollit me rreth 1281 gola në karrierë. Pikërisht në lidhje me këtë, Ronaldo deklaroi se disponueshmëria e videove të golave të tij i jep përparësi ndaj ikonave të së shkuarës. Kjo deklaratë ka bërë që shumë vëzhgues të rrudhin pak vetullat, ndërkohë që intervista është bërë virale në mediat sportive dhe në rrjeret sociale.
Pa përmendur emra, CR7 i shpjegoi ish-bashkëlojtarit të tij te Manchester United, Rio Ferdinand, pse golat e tij kanë një vlerë më të madhe: “Së shpejti do të rrumbullakos 900 gola, më vonë do të kaloj shifrën 1000. Po, dua të arrij 1000 gola. Nuk kam lëndime, kjo për mua është gjëja më e rëndësishme. Jam golashënuesi më i mirë në historinë e futbollit, gjë që unë mund ta vërtetoj”.
Ish-mbrojtësi i Anglisë shpërtheu në të qeshura dhe tha: “Ti je një bir kur*e. E ke fjalën për Alfredo Di Stefano, Pelé, Eusebio…” Ronaldo nuk e konfirmoi, por përsëriti shakanë, duke shtuar: “Nëse doni të shënoni më shumë gola, unë mund t’i përfshij edhe ato në stërvitje”.
Të dy arritën në përfundimin se Cristiano Ronaldo do të duhet të luajë të paktën deri në moshën 41-vjeçare për të arritur shifrën e 1000 golave. Ish-lojtari i Juventusit, Manchester United dhe Real Madridit ka zbuluar planet e tij, pas ‘daljes në pension’, duke thënë se nuk do të japë asnjë paralajmërim përpara se “t’i varë këpucët në gozhë’”.
Kontrata e pesë herë fituesit të Ligës së Kampionëve me Al Nassr do të skadojë verën e ardhshme. Në një intervistë të fundit për këtë, portugezi u shpreh: “Ende nuk e di se kur do të dal në ‘pension’, mendoj se do të ndodhë pas dy ose tri vitesh. Gjithsesi, me shumë mundësi do të ndodhë këtu tek Al Nassr, sepse jam i lumtur. Gjithashtu jam përshtatur shumë mirë me këtë vend”./ZËRI
