Ankthi para pushimeve? Ja çfarë po ndodh me ju…
Pushimet janë në horizont, dhe për shumicën janë sinonim i relaksit dhe çlodhjes. Por çuditërisht, jo për të gjithë. Për disa, ditët që i paraprijnë udhëtimit sjellin më shumë stres sesa gëzim. Në vend të eksitimit, përjetojnë nervozizëm, lodhje dhe një ndjenjë sikur po harrojnë diçka të rëndësishme. Kjo gjendje njihet si “sindroma para pushimeve”, dhe është shumë më e zakonshme nga sa mendohet.
Çfarë është kjo sindromë?
Është një lodhje emocionale dhe fizike që shfaqet pak para nisjes për pushime. Në vend që të ndiheni të çliruar, përfshiheni nga një presion i brendshëm për të përfunduar gjithçka – si në punë, ashtu edhe në jetën personale.
Simptomat më të zakonshme:
• Lodhje e vazhdueshme
• Probleme me gjumin
• Dhimbje koke apo tension muskujsh
• Nervozizëm i shtuar dhe luhatje humori
• Mungesë përqendrimi
• Ndjesi e vazhdueshme se po lini diçka pas dore
Kjo ndodh sepse trupi dhe mendja hyjnë në një “mod gare” – një përpjekje e vazhdueshme për të mbyllur të gjitha detyrimet përpara nisjes, duke krijuar një ngarkesë të padukshme.
Si ta menaxhoni më mirë këtë periudhë?
Planifikoni me kohë – Mos i lini detyrat për minutën e fundit.
Delegoni – S’keni pse i bëni të gjitha vetë. Jepni besim të tjerëve.
Përcaktoni prioritetet – Disa gjëra mund edhe të presin. Dhe kjo është në rregull.
Ruani rutinën – Mos sakrifikoni gjumin apo ushqimin. Trupi ka nevojë për stabilitet.
Shkruani çfarë ju shqetëson – Shpesh mendja çlirohet kur i hedhim gjërat në letër. Rikujtoni vetes që pushimet nuk janë mision – Nuk keni pse të “performoni”. Janë për ju.
Në vend që të shkoni në plazh të rraskapitur, bëni një pauzë që tani. Pushimet fillojnë në kokë, përpara se të arrini në destinacion./ZËRI
