TIRANË- "Urrejtja’’ u gatua në vitin e largët 2004, kur Leo Messi ishte 17-vjeçar dhe nuk gjeti minuta aktivizimi në Ligën e Kampioneve përveç 90 minutave ndaj Shaktarit të Donetskut në grupe. Barcelonën e dirigjonte në fushë braziliani Ronaldinjo dhe trajner ishte hollandezi Frenk Rajkard. Në anën tjetër te londinezët blu trajner ishte portugezi Murinjo.
Në fazën gjashtëmbëdhjetëshe të sezonit 2004/2005 për Ligën e Kampioneve, në ndeshjen e parë, që u luajt më 23 shkurt 2005, me dy gola në pjesën e dytë nga kamerunezi Eto’o dhe argjentinasi Maksi Lopez, Barcelona e fitoi takimin me përmbysje 2-1. Në këtë ndeshje, arbitri Andres Frisk dënoi me dy kartonë të verdhë sulmuesin kryesor të Çelsit të drejtuar nga Zhose Murinjoja, Didier Drogbanë, i cili braktisi ndeshjen përpara dy golave të përmbysjes së Barcelonës dhe u dënua për të mos luajtur në ndeshjen e kthimit. Trajneri Murinjo u tregua shumë i ashpër me arbitrimin dhe konkretisht me Andres Friskun. Klima e nxehtë që pasoi këtë ndeshje nuk u ndal aty. Andres Frisku nuk arbitroi më. Ai raportoi kërcënime me vdekje pas kartonit të kuq për Didier Drogbanë.
Ndeshjen e kthimit Çelsi e fitoi me një rezultat të thellë, 4-2. Dy supergolat e Ronaldinjos ishin të pafuqishme përpara tre golave të pjesës së parë dhe golit historik të kapitenit Terri, që e dërgoi Çelsin në çerekfinalen e Ligës së Kampioneve 2004/2005. Klima e parandeshjes, gjatë ndeshjes dhe pas saj mbolli farën e kësaj ‘’urrejtjeje’’. Në pjesën të këtij takimi për Barcelonën u aktivizua edhe trajneri i sotëm i kombëtares shqiptare, Silvinjoja.
Në sezonin pauses, 2005/2006, shorti vendosi që Barcelona dhe Çelsi ta ujisnin edhe një herë historinë e hidhur të një viti më parë: ato u takuan sërish në fazën gjashtëmbëdhjetëshe. Barcelona e fitoi ndeshjen e parë. Përsëri 2-1. Këtë here Leo Messi ishte në fushë dhe shkëlqeu.
Ndeshja e dytë pati sërish një karton të kuq. Asier Del Hornoja, lojtari me numrin tre i Çelsit, që atë ndeshje ishte ngarkuar ta mbulonte një kundër një 18-vjeçarin argjentinas, bëri një ndërhyrje shkatërruese që e nxori nga loja të dëmtuar Leo Messin. Vetë mbrojtësi meritoi të kuqin. Leo Messi humbi finalen e Parisit të atij sezoni pikërisht nga takat që ‘’i nguli’’ mbi gju mbrojtësi londinez në stadiumin e Londrës.
Messi u ritakua me Çelsin edhe tetë herë të tjera pas ndërhyrjes djallëzore të Del Hornos, në grupet e Ligës së Kampioneve 2005/2006, në dy gjysëmfinalet e sezonit 2008/2009, në dy gjysëmfinalet e sezonit 2011/2012 dhe dy ndeshjet gjashtëmbëdhjetëshe të sezonit 2017/2018. Nga të gjithë këto përballje, Leo Messi mundi të fitojë vetëm ndeshjen e fundit, 12 vjet më pas nga fitorja e parë. Bilanci i tij ndaj Çelsit të Londrës ishte ky: 10 ndeshje, 2 fitore, 6 barazime dhe 6 humbje, vetëm 3 gola të shënuar, të tre në dy ndeshjet e sezonit 2017/2018.
‘’Ka lojtarë që urrejnë Çelsin më shumë se sa Realin e Madridit. Nuk e mendoja se do ta dëgjoja veten duke e thënë këtë’’, pati deklaruar vetë Messi në vitin 2006. ‘’Kurrë nuk mendoja se do të shihja diçka më keq se sa Boka-River apo Argjentinë-Brazil, por është kështu’’, pati deklaruar Ylli i Argjentinës për përjetimet e zhveshtores së Barcelonës në përballjet me Çelsin e Londrës./ZËRI
