TIRANË- “Platforma online dhe rrjetet sociale po përdoren për fushata dezinformuese,"-kështu raportoi kryetarja e Shërbimit Informativ të Shtetit (SHISH), Vlora Hyseni. Sot, në mbledhjen e Komisionit të posaçëm për dezinformacionin, Hyseni tha se portale të ndryshme online po financohon për të ndërhyrë në procesin e zgjedhjeve parlamentare që do të mbahen në vitin që vjen.
"Dixhitalizimi dhe avancimet në teknologjinë e informacionit përmes platformave online në tërësi, rrjetet sociale, përveç avantazheve që sjellin në ofrimin e shpejtë të shërbimeve dhe informimin për qytetarët, rritjen e transparencës për publikun, ndërveprimin social, në këndvështrimin e sigurisë, po përdoret për fushata dezinformuese dhe kanë amplifikuar potencialin për shfrytëzimin e tyre dhe për dezinformacion. Në këndvështrimin e një shërbimi inteligjent, dezinformimi karakterizohet nga prodhimi dhe shpërndarja e qëllimtë e një informacioni të caktuar me një synim dhe impakt të caktuar për të cenuar sigurinë kombëtar, për të shkaktuar destabilitet, për të cenuar sigurinë e informacionit, sigurinë ekonomike e sigurinë shëndetësore. Përdorimi në shkallë të gjerë i hapësirave online dhe teknologjike të avancuara të informacionit, sjell sfida të reja të sigurisë, të cilat nuk mund të adresohen nga një institucion i vetëm. Ky ekosistem dixhital po shfrytëzohet me dimensione në rritje nga shtetet kundërshtare të sistemeve demokratike, shërbimet e tyre të sigurisë dhe inteligjencës, aktorë të tretë jo shtetërore për llogari të tyre, paralelisht me përcjelljen dhe sinkronizimin e propagandës për fushata dezinformomi të qëllimshme për të nxitur dhe shkaktuar destabilitet, për të influencuar perceptimin e opinionit publik dhe nxitur reagime të tij sipas synimeve të caktuara, për të ndërhyrë dhe manipuluar procese të rëndësishme demokratike, për të shkaktuar reagime të dhunshme kundër vendimmarrjeve të rëndësishme në fushën e sigurisë kombëtare, ndërkombëtare dhe asaj kolektike mbi procese politike të caktuara që lidhen me funksionimin e shoqërisë demokratike dhe qytetare, për të shkaktuar kaos dhe nxitur ndasi të thella sociale ekonomike për të cenuar sigurinë ekonomike të vendit e shëndetësore për të sfiduar besueshmërinë ndaj sistemit demokratike, të informacionit të vërtetë dhe për të shkaktuar konfuzion, për të identifikuar platoforma dixhitale me audiencë të lartë dhe burime njerëzore potenciale për financim apo edhe rekrutim në funksion të përcjelljes së deziformimit sipas synimeve konkrete. Nevojitet për t’i paraprirë këtij zhvillimi teknologjik të informacionit me kapacitete, adresimin e këtij fenomeni kërcënues me tendenca rritje me teknike legjislative kudërvënëse dhe parandaluese, duke respektuar detyrimin për transparencë e llogaridhënie në raport proporcional me kërcënimin. Çështja nuk është më a është prezent dezinformomi, por sa i sofistikuar dhe sfidues po shndërrohet dezinformimi, a janë prezent ndërhyrjet e huaja malinje në proceset demokratike, si t’i parandalojmë që ato dezinfirmacione mos të deformojnë proceset demokratike dhe masat ligjore dhe administrative të nevojshme që duhet të ndërmerren, kapacitetet që duhet të ndërtojmë në nivel vendi për të penguar realizimin e synimeve të tyre. Vlerësojmë se dezinformimi dhe operacionet e ndikimit malinj në proceset demokratike janë pjesë kritike e operacioneve informative të shteteve e shërbimeve të inteligjencave armiqësore. Dezinformimi dhe operacionet e ndikimit malinj në proceset demokratike janë pjesë kritike e operacioneve informative të shteteve e shërbimeve të inteligjencave armiqësore e jo miqësore. Hapësirat online do të mbeten shënjestër e tyre. Fushata dezinformuese e ndërhyrjet malinje theksohen në momente të rëndësishme si proceseve zgjedhore dhe situata të brishta të sigurisë dhe politike. Qëllimi ka qenë për të shkaktuar kaos dhe panik, shkaktuar konfuzione dhe minuar opinionin publik dhe institucionet. Teknologjitë e reja të komunikimit në epokën e inteligjencës artificiale po rrisin sofistikimin dhe vështirësitë e identifikimin e origjinës sidomos kur pas tyre qëndrojnë aktorë shtetërore, por edhe për shkak të programeve algoritmeve të shpërndarjes për audiencë të gjerë. Aktorët e huaj shtetërore shfrytëzojnë boshllëqet në legjislacion, sidomos në procese zgjedhore etj, instruktuarën elektronike, programe të reja për të përgatitur fushata ndërhyrje malinje apo të dezinformacionit”.
Më pas, mbledhja kaloi me dyer të mbyllura për shkak të informacioneve të klasifikuar.
Në mbledhjen e sotme mori pjesë edhe drejtoresha e Agjencisë Kombëtare të Shoqërisë së Informacionit (AKSHI) Mirlinda Karçanaj. Kjo e fundit ka zbuluar për herë të parë detajet e sulmit kibernetik iranian. Në takimin e sotëm, ku edhe ishte e ftuar për të dhënë informacione për deputetët dhe nga kryetarin e komisionit, Erion Braçe, Karçanaj tha se 10% e sistemeve dhe të dhënave arritën që të fshiheshin nga hakerat.
Pas përfundimit të mbledhjes, kryetari i Komisionit të Posaçëm Parlamentar kundër Dezinformimit, Erion Braçe mbajti një prononcim të shkurtër për gazetarët në Kuvend, ku u shpreh se ka shumë media, të cilat janë të përfshirë në dezinformim. Sipas Braçes, pjesa më e madhe e tyre janë të paregjistruara dhe funksionojnë në informalitet të plotë. Por sërish nuk përmendi emra.
“Ka ardhur pranë komisionit një listë e gjatë e medias online, që vihen në dispozicion apo dhe media vizive, që bien pre e dezinformimit. Ja dhe i publikuam, po pastaj? Pjesa më e madhe e tyre janë informale dhe të paregjistruar askund. Duhet të fillojë të rregullimi, regjistrimi dhe verifikimi i fakteve nga mediat, kaq kërkojmë, nuk kërkojmë ndonjë gjë të madhe. Kur flasim për mediat flasim për deklarim, duhet të ketë formalizim dhe kjo është themelore. Që të rikthemi te paketa antishpifje nuk ndodh. Me ekspertët do të merremi sa më shpejt të jetë e mundur, sapo të mbarojë seanca dëgjimore, unë do të ulem me ata vetë dhe të kemi një treg të medias që të jetë formal,”-tha Braçe.
Komisioni i Posaçëm për Dezinformimin do të funksionojë për një afat kohor 1-vjecar, dhe synon të nxisë identifikimin e ndërhyrjes së huaj në proceset demokratike duke nisur nga fushatat e dezinformimit nëpërmjet mediave tradicionale dhe atyre sociale. Ngritja e Komisionit erdhi si propozim i socialistëve me firmat e 7 deputetëve, kërkesë që sipas tyre ndjek të njëjtën linjë me vendet perëndimore dhe parlamentin evropian në luftën kundër dezinformimin dhe ndërhyrjen nga vendet e huaja. Në përfundim të punës 1-vjecare, Komisioni do të përgatisë një raport me analizat, gjetjet dhe propozimet për ndryshimet ligjore dhe masat administrative./ZËRI
