TIRANË- Kryedemokrati Sali Berisha është paraqitur paraditen e kësaj të hëne në SPAK, lidhur me zbatimin e masës “detyrim paraqitje”, për dosjen “Partizani. Pas daljes nga Prokuroria e Posaçme, Berisha është ndalur në një prononcim për mediat, ku i është rikthyer deklaratës së fundit të kryeministrit Rama për agjentët e BKH-së, për një episod në dyert e Kryeministrisë.
Berisha ironizon deklaratën e Ramës, teksa thotë se 'agjentët e BKH-së e tmerruan kryeministriin kur ata i shkuan te zyra", një ngjarje kjo sipas kryedemokratit, që është mbajtur e fshehtë për gati 20 ditë. Lideri demokrat nuk harroi të lëshonte akuza për vendimin më të fundit të Kushtetueses lidhur çështjen Balluku, duke e cilësuar të turpshëm e të paprecedent.
"Më patllake të vërteta nuk do ketë, se na e tmerruan kryeministrin. Do të çarmatosen që të gjithë agjentët e BKH dhe do armatosen me patllake dërrase, më patllake të vërteta nuk do kenë se na tmerruan kryeministrin, dhe e kishte mbajtur të fshehtë 20 e ca ditë. Shkuarjen e agjentëve të BKH në kryeministri me patllake, Rama i tmerruar e mbajti të fshehtë 20 e ca ditë dhe e nxori të nesërmen e vendimit të Irenave të Kushtetueses. Të vendimit antikushtetues, antiligjor, të turpshëm, të paprecedent në historinë e Europës dhe botës për një vend me shtet ligjor.", tha Berisha për mediat.
Kryeministri Rama zbuloi dje episdodin befasues sipas tij, pasi agjentë të BKH-së kishin shkuar në Kryeministri të armatosur. Sipas deklaratës së Ramës, hetuesit nuk kanë pranuar të çarmatosen, ndërsa në një reagim të BKH-së, sqarohet se agjentët i kanë lënë armët pas komunikimit me Gardën. Nga ana tjetër, edhe kryedemokrati Berisha e komentoi deklaratën në një komunikim publik, duke theksuar se Rama është ndjerë i frikësuar nga një arrestim i mundshëm.
Sa i përket paraqijtes së Berishës në SPAK për dosjen "Partizani", ish-kryeministri Sali Berisha akuzohet për “korrupsion pasiv të zyrtarëve të lartë”, kryer në bashkëpunim, ndërsa Jamarbër Malltezi për korrupsion aktiv dhe pastrim parash.
Dosja lidhet me privatizimin e ish-kompleksit sportiv “Partizani” në Tiranë, që dikur ishte pronë e Ministrisë së Mbrojtjes. Hetimet e SPAK pretendojnë se ky proces është zhvilluar në mënyrë të paligjshme dhe ka sjellë përfitime të padrejta për Jamarbër Malltezin, dhëndrin e ish-kryeministrit Sali Berisha./ZËRI
