TIRANË-Komisioni Qendror i Zgjedhjeve ka përfunduar shqyrimin e kërkesave nga votuesit jashtë territorit shqiptar, të cilët përmes Platformës Elektronike të Regjistrimit (PER) u regjistruan për të pasur mundësinë të votojnë në zgjedhjet e 11 majit.
Sot përfundoi dhe procesi i shqyrtimit të kërkesave të mbetura nga 294,155 që ishin bërë deri në mbarim të afatit. Janë 245,975 shqiptarë që jetojnë jashtë vendit, të cilët do të ushtrojnë të drejtën e votës. Ndërsa u është refuzuar kërkesa për 48,180 për shkak të gabimeve në fazën e rregjistrimit apo dokumentacionit jo të plotë.
Numri më i madh i shqiptarëve të regjistruar është nga Italia me 91,223 , renditur më pas nga Greqia me 68,386 zgjedhës të regjistruar, Gjermania me 25 499 si dhe nga SHBA me 20 653 e Britania e Madhe 17 227. Ndërsa aplikimi nga shtetasi me moshën më të madhe ka ardhur nga Gjermania dhe ishte 98 vjeç, i ditëlindjes 1927.
52,425 votues të regjistruar i përkasin Tiranës, e pasuar nga Fieri me 32,559 votuesë nga jashtë dhe Durrësi e Elbasani me 25 mijë të tillë.
Sipas gjinisë, përqindjen më të lartë të regjistruesve e kanë meshkujt, me 212 982 kërkesa, ndërsa femrat janë 152 184.
Në mesnatën e 4 marsit u mbyll aplikimi online në platforën PER. Për herë të parë, emigrantët do të votojnë me postë për zgjedhjet parlamentare që do të mbahen më 11 majit. Komisioni Rregullator pranë KQZ-së rrëzoi me shumicë votash kërkesën për të shtyrë me 5 ditë afatin për aplikimin dhe regjistrimin e shtetasve që do të votojnë nga jashtë vendit.
Brenda datës 9 mars, Komisioni Qendror i Zgjedhjeve pritet të publikojë listën paraprake të këtyre zgjedhësve. Emrat e tyre do të hiqen më pas nga lista e votuesve në Shqipëri./ZËRI
