TIRANË- Mosshlyerja e kredive në vlera qesharake, ose edhe shlyerja me vonesë e detyrimeve, është kthyer në një gangrenë me pronat në vendin tonë. Rreth 17 mijë familje po përballen me një skemë mashtrimi që po tjetërson pronat e tyre, skemë e cila është denoncuar nga Ministria e Drejtësisë në Prokurorinë e Tiranës, dhe organet e drejtësisë bëjnë ping-pong mes tyre dhe nuk i japin zgjidhje problemit.
Në emisionin “Kronos” është trajtuar mbrëmjen e djeshme një rast flagrant, ku një familje është përballur me bllokimin e dy apartamenteve, për shkak se nuk kishte shkyer një kredi prej 50 mijë lekësh të vjetra, që kishte marrë në bankën Societe Generale. Ky detyrim në shifrën qesharake, Societe Generale ia kishte shitur Micro Credit Albania, dhe penalitetet me kalimin e viteve vetëm sa u shtuan.
Institucioni Micro Credit Albania ka blerë një pjesë të portofolit të kredive të humbura nga bankat e nivelit të dytë, dhe më pas ka nisur seria e bllokimit të në sërë pasurive të patundshme. Për të shlyer kredinë e parë, MCA i detyronte qytetarët që të merrnin kredi pranë saj me interesa shumë të larta.
Skema më pas zgjerohet dhe në lojë hyjnë disa zyra përmbarimi, notere, agjenci imobiliare, punonjës të bankave dhe kadastrës.
Postimi i gazetares Ola Xama:
I kishin mbetur pa shlyer 50 mijë lekë të vjetra nga një kredi që kishte marrë në bankën Societe Generale. Detyrimi i shitet kompanisë së mbledhjes së borxheve Micro Credit Albania. Kësaj shume i shtohen penalitete, kamata dhe tarifa përmbarimore. I bllokojnë dy apartamente në Tiranë, të cilat nuk u liruan as kur u pagua detyrimi.
Duket e pabesueshme që në vitin 2024, dikush që është dorëzanës për kredinë e një miku i merret shtëpia për një detyrim të mbetur me vlera qesharake. Një tjetri i është ngatërruar emri, por prona i është sekuestruar për 8 vjet dhe vazhdon e bllokuar. Qindra të tjerë që kanë patur borxhe të pashlyera, janë detyruar të marrin kredi dhe të paguajnë në fund 2 deri në 3 herë më shumë.
Për mua nëse ka një test për drejtësinë e re, është ky. Ka katër vjet që një skemë mashtrimi, e cila po tjetërson pronat e mijëra familjeve, është denoncuar nga Ministria e Drejtësisë dhe organet e drejtësisë bëjnë ‘ping-pong’.
Disa përpiqen ta trajtojnë si një luftë mes një grupi përmbaruesish për të kapur dhe përvetësuar sa më shumë. Dhe pse duket një lojë pushteti dhe parash, kjo ‘përplasje’ shërbeu për të zbuluar aferën e cila po kërkon të mbyllet nga njerëz që vazhdojnë grabitjen e pronave të qytetarëve. Në skemë janë individë shumë të fuqishëm, në qeveri, banka dhe drejtësi, që po përpiqen të shuajnë skandalin e zhvatjes të 17 mijë qytetarëve!
Po si ka funksionuar kjo skemë?
Institucioni Micro Credit Albania ka blerë një pjesë të portofolit të kredive të humbura nga bankat e nivelit të dytë. Fillimisht nisi bllokimin e pasurive të patundshme dhe i detyronte të merrnin kredi pranë saj me interesa shumë të larta.
Skema më pas zgjerohet dhe në lojë hyjnë disa zyra përmbarimi, notere, agjenci imobiliare, punonjës të bankave dhe kadastrës. Lidhjet dhe bashkëpunimi i këtij grupi është hetuar nga Ministria e Drejtësisë, por raporti i dorëzuar në prokurori nuk ka të gjithë emrat e bashkëpunëtorëve. Janë hequr disa zyra që sot po bëjnë ankande fiktive dhe po marrin pronat duke i regjistruar në emër të institucionit MCA.
Drejtësia ka të identifikuar ideatorët, disa nga bashkëpunëtorët, bashkë me dokumentacionin që e vërteton këtë. Përse ka 4 vjet që nuk vepron dhe lejon të vazhdojë grabitja?!
Sot kryesuesit e skemës së mashtrimit që kanë përvetësuar miliona euro pasuri jetojnë të lumtur në Paris. Një skandal me këto përmasa dhe me 17 mijë të prekur, siç thotë në intervistën e dhënë në Kronos Pano Soko, do të testonte qeverinë dhe jo vetëm drejtësinë!
/ZËRI
