SUEDI- Suedia do të bëhet zyrtarisht anëtare e NATO-s më 11 mars, raportoi media suedeze “TV4”. Flamuri i Suedisë do të ngrihet në selinë e NATO-s në Bruksel të hënën në mesditë, duke shënuar fillimin zyrtar të anëtarësimit të vendit në Aleancë. Suedia do të bëhet anëtari i 32-të i NATO-s dhe vendi i dytë që do t’i bashkohet pas fillimit të pushtimit në shkallë të plotë të Ukrainës nga Rusia.
Një ditë më parë kryetari i parlamentit hungarez Sandor Lezak nënshkroi ratifikimin e protokollit të pranimit të Suedisë në NATO dhe i dërgoi projektligjin zyrës së presidentit të vendit për nënshkrim. Deputetët hungarezë miratuan anëtarësimin e Suedisë në NATO më 26 shkurt, duke hequr pengesën e fundit për vendin nordik për të ndërmarrë një hap historik dhe për të thyer neutralitetin e tij që ka ruajtur gjatë dy Luftërave Botërore dhe Luftës së Ftohtë.
Suedia dhe Finlanda aplikuan për anëtarësim në vitin 2022, por pranimi i tyre u pengua nga kundërshtimet e Turqisë dhe Hungarisë. Ndërsa Finlanda iu bashkua Aleancës në prill të vitit 2023, Turqia ratifikoi ofertën e Stokholmit në janar të vitit 2024. Presidenti hungarez Tamas Sulyok nënshkroi projektligjin për pranimin e Suedisë të martën, duke hequr pengesën përfundimtare./ZËRI
