UKRAINË- Një sulm rus në një lagje të qytetit industrial të Krevi Ry në Ukrainën qendrore, vendi nga vjen edhe presidenti Volodymyr Zelenskyy, vrau të paktën 18 persona dhe plagosi më shumë se 60 të tjerë, përfshirë shumë fëmijë. Sipas autoriteteve, ky ishte një prej sulmeve më vdekjeprurëse në javët e fundit.
Volodymyr Zelenskyy denoncoi sulmin duke u shprehur se Moska provoi sërish se nuk e dëshiron një armëpushim.
"Çdo sulm me raketa dhe dronë dëshmon se Rusia nuk dëshiron asgjë përveç luftës. Dhe vetëm presioni ndërkombëtar ndaj Rusisë dhe të gjitha përpjekjet e mundshme për të forcuar Ukrainën, mbrojtjen tonë ajrore dhe forcat tona të armatosura, do të lejojnë të përcaktojmë se kur do të përfundojë kjo luftë,"-tha Zelenskyy pas sulmit.
Raketa goditi një zonë afër shtëpive, një këndi lojërash, ndaj edhe disa prej viktimave dhe të plagosurve janë fëmijë. Serhii Lysak, guvernatori i Dnipropetrovsk, thotë se ka të paktën 18 të vdekur, përfshirë nëntë fëmijë dhe të paktën 61 të plagosur, mes tyre 12 të mitur.
Ministria ruse e Mbrojtjes mori përsipër sulmin me raketa në Kryvyi Rih të premten. Ata pretenduan se raketa kishte shënjestruar një restorant ku komandantët ukrainas dhe instruktorët ushtarakë perëndimorë po takoheshin, duke vrarë gjithsej 85 ushtarakë. Moska ka pretenduar prej kohësh se synon vetëm objektiva ushtarake, megjithëse sulmet e drejtpërdrejta godasin civilë.
Qyteti, vendlindja e presidentit ukrainas, është rreth 80 kilometra nga fronti dhe ka qenë një objektiv i shpeshtë i sulmeve ajrore që kur ushtria ruse pushtoi Ukrainën në shkurt 2022./ZËRI
