KIEV-MOSKË- Një javë pas fillimit të pushtimit të befasishëm ukrainas të rajonit kufitar të Kurskut, ushtria ruse nuk është ende në gjendje të përballet me forcat armike. Fronti i Kievit po vazhdon në zgjerohet dhe bastisje të shumta janë kryer në Belgorod. Autoritete ruse u detyruan të evakuojnë disa vendbanime.
Presidenti ukrainas, Volodymir Zelenskyy informoi se forcat e tij kishin arritur dje të merrnin nën kontrollin e tyre 1000 kilometra katrorë të territorit rus. Nëse raporti është i vërtetë, kjo tregon se ushtria ukrainase ka përparuar më shumë se ajo ruse gjatë dy muajve të fundit. Në një postim në platformën 'Telegram', Zelenskyy konfirmoi për herë të parë se ushtria ukrainase po vepron brenda territorit rus dhe përgëzoi ushtarët dhe komandantët e tyre për guximin dhe veprimet e tyre vendimtare. Në të njëjtin postim, ai vuri në dukje se Ukraina do të ofrojë ndihmë humanitare për popullsinë civile ruse që po vuan nga operacionet.
Në të njëjtën kohë, guvernatori i Kurskut, Alexei Smirnov, i raportoi presidentit Putin se forcat ukrainase kishin depërtuar në një thellësi prej 12 kilometrash në një front prej 40 kilometrash, duke arritur të merrnin nën kontrollin e tyre 28 vendbanime. Për herë të parë që nga Lufta e Dytë Botërore, mediat ndërkombëtare treguan ushtarë që ngrinin flamurin e një shteti të huaj në një pjesë të territorit rus.
Zelenskyy konfirmoi se ushtria po vepronte në territorin rus, ndërsa Putin premtoi se "armiku do të gjejë përgjigjen që meriton". Nga ana tjetër, aleatët e Uklrainës kanë ngritur shqetësimet e tyre. Ministri i Jashtëm italian Antonio Tajani nënvizoi se armët që vendi i tij i ka dhënë Ukrainës "nuk mund të përdoren për sulme kundër Rusisë në territorin e saj"./ZËRI
