SHBA- Donald Trump, ish-presidenti i SHBA-së, e ka dhënë disa herë se është i vetmi person që mund t'i japë fund luftës që Rusia po bën në Ukrainë. Informacioni për këtë plan sekret dhe afatgjatë të Trumpit u publikua nga "Washington Post", duke cituar njerëz që kanë dijeni lidhur me planet e ish-kreut të Shtëpisë së Bardhë.
Gazeta amerikane thekson se disa ekspertë të politikës së jashtme kanë vlerësuar se kjo ide e Trump do të sillte praktikisht një shpërblim për presidentin rus Vladimir Putin. Sipas tyre, Trump do të detyrojë Ukrainën që të dorëzojë Krimenë dhe rajonin kufitar të Donbasit. Kështu i kanë thënë kësaj gazete personat që kanë biseduar me Trump dhe këshilltarët e tij por të gjithë kanë insistuar që të kenë kushtet e anonimatit për shkak të konfidencialitetit të bisedave që kanë pasur me ish-presidentin amerikan.
Trump, kandidati i supozuar republikan në zgjedhjet presidenciale të nëntorit, i cili shpreson të kthehet në pushtet, shpesh është mburrur se ai mund të negociojë një marrëveshje paqeje midis Rusisë dhe Ukrainës brenda 24 orëve sa të marrë fitoren, madje edhe para se të shkelë sërish në Shtëpinë e Bardhë. Por kurrë nuk e ka thënë publikisht se cili është plani i tij. Analistët politikë të afërt me Trump gjithashtu kanë theksuar nevojën për të adresuar kërcënimet ndaj interesave amerikane që vijnë nga Kina dhe kërkojnë t'i japin fund varësisë së Rusisë nga vendi aziatik.
Një person që pati një bisedë private me Trump i tha "Washington Post" se ai mendon që Rusia dhe Ukraina tani duan të ndalin luftën dhe të shpëtojnë fytyrën e tyre. Por gazeta amerikane thotë se pranimi i kontrollit rus mbi pjesë të reja të Ukrainës do të zgjeronte shtrirjen e diktaturës së Putinit.
Megjithatë edhe ideja e Trump ka kundërshtarë. Ka njerëz që u përpoqën të bindin ish-kreun e Shtëpisë së Bardhë që të mos avokonte për një fund të tillë të luftës.
"Kam kaluar 100 për qind të kohës sime duke folur me Trump për Ukrainën. Ai (Putin) duhet të paguajë çmimin për luftën që shkaktoi. Ai nuk mund të fitojë në fund,”- tha Lindsey Graham, një senatore republikane nga Karolina e Jugut./ZËRI
