SHBA- Presidenti amerikan Donald Trump ka lajmëruar se deri më 5 prill do të arrihet një marrëveshje me kompaninë mëmë të TikTok, ByteDance për të shitur aplikacionin. Trump u shpreh se ka shumë blerës potencialë.
“Ne kemi shumë blerës potencialë. Ka një interes të jashtëzakonshëm për TikTok. Unë dua që TikTok të përdoret në SHBA”, u shpreh Trump.
Trump e zgjati afatin për ndalimin e TikTok deri më 5 prill, pasi nënshkroi një urdhër ekzekutiv në ditën e tij të parë në detyrë.
Reuters raportoi të premten se firma e kapitalit privat Blackstone po shqyrton mundësitë për të arritur një marrëveshje me TikTok në SHBA. Firma po konsideron t’i bashkohet aksionerëve aktualë jo-kinezë të ByteDance, të udhëhequr nga Susquehanna International Group dhe General Atlantic, në sigurimin e kapitalit të ri për të ofruar ofertë për operacionet e TikTok në SHBA. Grupi është shfaqur si kryesues në bisedimet e marrëveshjes së TikTok.
Trump ka deklaruar më parë se është i hapur për të zgjatur sërish afatin nëse nuk arrihet një marrëveshje./ZËRI
