SHBA- Presidenti i Shteteve të Bashkuara, Donald Trump, ka pritur së fundmi në Zyrën Ovale kryeministrin izraelit, Benjamin Netanyahu. Sipas një zyrtari izraelit, gjatë takimit në Zyrën Ovale u diskutuan tre skenarë të ndryshëm lidhur me Iranin, të paraqitur nga Netanyahu.
Skenari i parë parashikon arritjen e një marrëveshjeje të re diplomatike mes SHBA-së, Izraelit dhe Iranit, me synimin për t'i dhënë fund tensioneve që kanë vijuar prej muajsh.
Opsioni i dytë përfshin vendosjen e sanksioneve të reja politike dhe ekonomike ndaj Iranit, në rast se nuk arrihet një marrëveshje.
Ndërsa skenari i tretë parashikon mundësinë e nisjes së një sulmi të ri ushtarak në shkallë të gjerë kundër Republikës Islamike të Iranit.
Zyrtari izraelit u tha gazetarëve në Uashington se Netanyahu nuk u përpoq të avanconte ndonjë strategji të caktuar kundër Teheranit, por paraqiti alternativat që, sipas tij, mund të ndiqen në varësi të zhvillimeve. Gjatë takimit mes dy liderëve, u analizuan me kujdes avantazhet dhe disavantazhet e secilit skenar. /ZËRI
