SHBA- Në këmbim të një shtëpie luksoze me vlerë 4 milionë dollarë në Nju Jork, një shtëpi pushimi me vlerë 2 milionë dollarë në Honolulu, një Ferrari Roma të vitit 2024, Linda Sun, një këshilltare e shtetit të Nju Jorkut, akuzohet për spiunazh për Kinën gjatë 14 viteve të fundit.
Sun, e cila shërbeu në këtë pozicion gjatë administratës së Kuomo dhe Hochul, akuzohet se ka ndihmuar qeverinë kineze të ketë akses në thirrjet zyrtare në lidhje me COVID-19, duke përdorur pozicionin e saj për të ndihmuar zyrtarët kinezë duke dërguar fshehurazi dokumente në Pekin.
Sipas BBC, në këmbim, Pekini ndihmoi 41-vjeçaren Sun dhe bashkëshortin e saj, Christopher Hu, të blinin një shtëpi prej 4.1 milionë dollarësh në Nju Jork, një apartament me pamje nga oqeani me vlerë 2.1 milionë dollarë në Honolulu dhe automjete luksoze duke përfshirë një Ferrari Roma të vitit 2024.
Dhuratat përfshinin gjithashtu udhëtime të paguara plotësisht në Kinë, bileta për shfaqje, koncerte dhe ngjarje sportive, punë në Kinë për kushëririn e Sun dhe dërgesa në shtëpi të rosave të kripura të stilit Nanjing të përgatitura nga kuzhinieri personal i një zyrtari të qeverisë kineze. Sipas aktakuzës, këto vakte janë bërë dhuratë të paktën 16 herë për Sun dhe familjen e saj.
Aktakuza gjithashtu përshkruan se në vitin 2020, në mes të pandemisë së koronavirusit, ajo gjeti mënyra që zyrtarët konsullorë kinezë të kishin akses te zyrtarët kryesorë në shtetin e Nju Jorkut. Në një rast, ajo madje arriti të shtojë fshehurazi një zyrtar kinez në një telefonatë private me qeverinë e shtetit në lidhje me përgjigjen e shëndetit publik ndaj virusit.
Të martën në mëngjes, agjentët federalë hynë në shtëpinë e çiftit në Long Island dhe i arrestuan ata me 10 akuza. Një gjykatës e liroi çiftin me kusht duke kufizuar udhëtimin e tyre në vetëm tre shtete të SHBA-së dhe për të shmangur çdo kontakt me përfaqësuesit e konsullatës kineze ose misionet diplomatike kineze në Nju Jork./ZËRI
