SHBA- Presidenti Donald Trump ka njoftuar se ka rënë dakord për një armëpushim dyjavor me Iranin, më pak se dy orë para afatit të tij për Iranin dhe pas kërcënimeve të tij për të shkatërruar një “qytetërim të tërë”.
Të martën në mbrëmje, brenda pak orësh nga sulmi i planifikuar, Trump njoftoi lajmin në platformën e tij, Truth Social. Ai ia atribuoi Pakistanit ndërmjetësimin e zgjidhjes, por paralajmëroi se ajo erdhi me kushte, përkatësisht që Irani të rihapë Ngushticën e Hormuzit.
“Bazuar në bisedat me Kryeministrin Shehbaz Sharif dhe Feldmarshal Asim Munir të Pakistanit, dhe ku ata kërkuan që unë të pezulloj forcën shkatërruese që do të dërgohet sonte në Iran, dhe me kusht që Republika Islamike e Iranit të bjerë dakord për HAPJEN E PLOTË, TË MENJËHERSHME dhe TË SIGURTË të Ngushticës së Hormuzit, unë pajtohem të pezulloj bombardimet dhe sulmet ndaj Iranit për një periudhë prej dy javësh”, shkroi Trump.
Mesazhi u postua në internet në orën 6:32 pasdite sipas kohës lindore të SHBA-së (22:32 GMT), pak më pak se një orë e gjysmë para afatit të fundit të Trump në orën 8 të mbrëmjes (00:00 GMT) për sulmin.
Menjëherë pas mesazhit të Trump, Ministri i Punëve të Jashtme i Iranit, Abbas Araghchi, konfirmoi se ishte arritur një marrëveshje paraprake.
“Nëse sulmet kundër Iranit ndalen, Forcat tona të Fuqishme të Armatosura do të ndërpresin operacionet e tyre mbrojtëse”, shkroi Araghchi.
"Për një periudhë dy-javore, kalimi i sigurt nëpër Ngushticën e Hormuzit do të jetë i mundur nëpërmjet koordinimit me Forcat e Armatosura të Iranit dhe duke marrë në konsideratë kufizimet teknike."
Araghchi gjithashtu falënderoi Pakistanin për thirrjen e tij të minutës së fundit për të pezulluar fushatën e bombardimeve amerikane. Këshilli i Lartë i Sigurisë Kombëtare i Iranit la të kuptohej gjithashtu në një deklaratë të veçantë se armëpushimi mund të zgjatet përtej dy javëve fillestare nëse negociatat vazhdojnë në mënyrë të favorshme./ZËFRI
