PEKIN – Serbia ka marrë armë nga Kina. Zëvendëskryeministri serb dhe ministri i Mbrojtjes, Millosh Vuçeviç tha nga Pekini se bashkëpunimi ushtarak Serbi-Kinë mbështet modernizimin e mbrojtjes së Serbisë dhe fuqizon aftësitë e saj mbrojtëse.
Në një intervistë për median shtetërore të Kinës, ‘Global Times’, Vuçeviç vuri në dukje se ai pret zhvillimin e mëtejshëm të bashkëpunimit kinezo-serb, veçanërisht në mbrojtje.
Ai tha se dorëzimi i sistemit të raketave kundërajrore me rreze të mesme të prodhimit kinez FK-3 dhe UAV-ve CH-95 dhe CH-92A, i bën Forcat e Armatosura Serbe (SAF) dukshëm më të forta, duke u dhënë atyre aftësi që nuk i kishin pasur më parë.
"Ne do të vazhdojmë të rrisim aftësitë tona, si në burimet njerëzore, ashtu edhe në armë dhe pajisje ushtarake, në mënyrë që të jemi në gjendje të mbrojmë popullin tonë, kudo që ata jetojnë, dhe në mënyrë që të jemi garantues i pavarësisë së Serbisë.
Ne jemi vërtet mirënjohës për mbështetjen me gjithë zemër të Kinës për ruajtjen e sovranitetit dhe integritetit territorial të Serbisë. Qëndrimi i Kinës për çështjen e Kosovës, ka qenë gjithmonë parimor dhe konsistent, gjë që është dëshmi e miqësisë së vërtetë midis dy vendeve", tha Vuçeviç. Ministri përsëriti se Serbia mbështet parimin e një Kine të pavarur dhe dënoi të gjitha përpjekjet për të kërcënuar unitetin e Kinës, në lidhje me çështjen e Tajvanit.
Ai tha se Kina, ndryshe nga fuqitë e tjera të mëdha, nuk i kërkoi asnjë kusht bashkëpunimit të saj me Serbinë dhe ishte një nga miqtë më të besueshëm të Serbisë.
"Në përgjithësi, marrëdhëniet Serbi-Kinë kanë qenë jashtëzakonisht të ngushta vitet e fundit dhe po zhvillohen kryesisht për shkak të marrëdhënieve të shkëlqyera midis dy presidentëve - Aleksandar Vuçiç dhe Xi Jinping. Miqësia e hekurt tradicionale dëshmohet nga fakti se në dy vjet do të shënohet 70 vjetori i vendosjes së marrëdhënieve diplomatike mes dy vendeve tona.
Ne e konsiderojmë Kinën mikun tonë tradicional dhe afatgjatë në këto kohë sfiduese, por gjithashtu një nga faktorët vendimtarë që kontribuojnë në paqen dhe stabilitetin global, gjë që është vërtetuar shumë herë me politikën e Kinës në kohë paqeje dhe lëvizjet e mençura politike," tha gjithashtu Vuçeviç.
Perforcimi me armë i Serbisë nga ana e Kinës, vjen në një kohë, që në Kosovë, tensionet janë të larta mes palëve./Zëri.ai/
