UASHINGTON- Kandidatja demokrate për presidente të SHBA-së, Kamala Harris, ka zgjedhur guvernatorin e Minesotës, Tim Walz, si kandidatin e saj për zëvendëspresident nëse fiton zgjedhjet. Pasi Walz u përzgjodh ai mbajti një fjalim para mbështetësve të tij demokratë. Ai tha se i është mirënjohës Harris, për përzgjedhjen dhe se do të bëj çdo gjë për vendin e tij.
“Është nderi i jetës sime të përfshihem me Kamala Harris në këtë fushatë. Ne jemi këtu së bashku për më të mirën e vendit tonë. Harris na tregon me politikën e saj se çdo gjë është e mundur të realizohet për të mirën e qytetarëve. Kjo më kujton ditën e parë të shkollës, ku kisha vizione për të ardhmen. Le t’i bëjmë ato vizione realitet,"- tha ai.
Sipas Reuters, përzgjedhja e Walz do ta ndihmojë atë të tërheqë vota nga grupi i votuesve të bardhë ruralë amerikanë.
Paraqitja e parë e dyshes demokrate u bë në Filadelfia të Pensilvanisë, një shtet që konsiderohet si një nga më kritikët për rezultatin e zgjedhjeve.
"Kimia" e saj me Tim Walz ishte një faktor në përzgjedhjen e tij nga Harris, tha për mediat e huaja një burim i afërt me guvernatorin e Minesotës për CNN.
“Koha që ata kaluan së bashku kur Walz po bënte fushatë për rizgjedhje në 2022 dhe kur ata vizituan klinikën e abortit në mars të këtij viti padyshim pati një ndikim të madh. Pastaj, në krye të kësaj, fushata e Harris, si të gjithë ne, pa se sa ndikues ishte Walz tek demokratët. Ata panë se sa popullor është ai në Minesota. Pra, ishte një lloj situate ku çdo gjë ishte në vendin e duhur”, tha burimi.
Një ushtarak veteran me një axhendë progresive
Walz, një veteran 60-vjeçar i Gardës Kombëtare të Ushtrisë Amerikane dhe ish-mësues, u zgjodh në Dhomën e Përfaqësuesve të SHBA në vitin 2006. Ai shërbeu aty 12 vjet përpara se të zgjidhej guvernator i Minesotës në 2018.
Si guvernator, ai nxiti një axhendë progresive që përfshin dreka falas në shkollë, projekte për të adresuar ndryshimet klimatike, ulje të taksave për klasën e mesme dhe rriti pushimet e paguara për punëtorët e Minesotës. Ai është një mbrojtës i vendosur i të drejtave riprodhuese të grave, por shfaqi reflekse konservatore ndërsa përfaqësonte shtetin e tij rural në Dhomën e Përfaqësuesve të SHBA.
Ai është gjithashtu një mbështetës i të drejtave të armëve.
Harris, vajza e emigrantëve nga Xhamajka dhe India, plotëson kështu fushatën e saj. Minesota konsiderohet një shtet "blu" (voton vazhdimisht Demokratët), por kufizohet me Wisconsin dhe Michigan, dy shtete vendimtare për rezultatin e zgjedhjeve. Zgjedhja e Walz u ndikua nga fakti se ai ka aftësinë për të arritur tek votuesit e bardhë nga zonat rurale, të cilët vitet e fundit i janë drejtuar Donald Trump.
Stafi i Harris shpreson që karriera e gjatë e Walz-it në Gardën Kombëtare, e kombinuar me një karrierë të suksesshme si trajner futbolli në shkollë të mesme, si dhe videot e tij të postuara me humor, do të tërheqë atë pjesë të votuesve që nuk duan një mandat të dytë të Trump në Shtëpinë e Bardhë.
Reagimi i republikanëve
Donald Trump, në postimin e tij, sulmon Walz-in, duke thënë se nëse zgjidhet nënkryetar, ai do të sjell ferrin në Tokë: Tim Walz DO TË ISHTE ZËVENDËPRESIDENTI MË I KEQI NË HISTORI! Edhe më keq se Kamala Harris, liberale dhe e korruptuar e rrezikshme - AJO ËSHTË KAQ E KEQE. Ajo do të çlirojë FERRIN NË TOKË dhe do të hapë kufijtë tanë për kriminelët më të këqinj që mund të imagjinohet. Ai do të vulosë MASHTRIMIN E RI të Gjelbër (projekti i Kamala Harris për ndotjen golbale) të Kamalës dhe do t'i vërë flakën TRE miliardë dollarëve taksa nga qytetarët tanë.
Reagimet fillestare të republikanëve ndaj përzgjedhjes së Walz u përqendruan në të qenit "shumë progresiv". Ai gjithashtu u sulmua për trazirat në Minneapolis pas vrasjes së George Floyd në 2020. Një deklaratë nga Carolyn Levitt, një zëdhënëse e fushatës së Trump tha: Walz është i fiksuar pas promovimit të agjendës së rrezikshme liberale të Kalifornisë. Ai është një ekstremist i rrezikshëm liberal dhe ëndrra e Kalifornisë Harris-Walz janë makthi i amerikanëve.
Sipas NYT, fushata e Trump u dërgoi një e-mail mbështetësve të kandidatit republikan me mesazhin: "Tim Walz do të sjellë ferrin në tokë".
"Miku i Izraelit"
Grupi Mazhoranca Demokratike për Izraelin lëshoi një deklaratë duke lavdëruar Walz, duke e quajtur atë një "demokrat pro-izraelit me një histori të fortë mbështetjeje për marrëdhëniet SHBA-Izrael".
Shumë demokratë që mbështesin fuqishëm Izraelin kishin shprehur preferencën e tyre për guvernatorin Josh Shapiro të Pensilvanisë, i cili ka qenë një mbështetës më i fortë i luftës në Gaza. Minneapolis ka një popullsi të madhe myslimano-amerikane dhe Walz u kërkoi demokratëve të dëgjojnë shqetësimet e tyre.
Shtatë nga dhjetë amerikanë nuk e njohin Walzin
Shumica e amerikanëve nuk e njohin Tim Walz, sipas një sondazhi të NPR/PBS/Marist të publikuar të martën. 71% e të rriturve amerikanë nuk kanë dëgjuar kurrë për Walz ose nuk janë të sigurt se si ta vlerësojnë atë – duke e bërë atë edhe më pak të njohur se finalistët e tjerë Mark Kelly dhe Josh Shapiro. Sondazhi, i cili u krye nga 1-4 gusht, zbulon se 17% e të rriturve amerikanë e shohin si të favorshëm Walz-in, ndërsa 12% e shohin atë si aspak favorit.
Sondazhi i jep Walz-it një vlerësim të favorshëm prej 31 përqind mes demokratëve, ndërsa vetëm 7% demokratë e vlerësojnë atë të pafavorshëm.
Kush është gruaja e tij?
Përpara se të fillonte në politikë, guvernatori i Minesotës, Tim Walz, i zgjedhur të martën për të qenë kandidati i zëvendëspresidentes Kamala Harris, ishte një mësues për një kohë të gjatë, ashtu si gruaja e tij. Gwen Walz ka dhënë mësim në shkolla publike, në shkolla për emigrantët, si dhe në burgje. Ajo gjithashtu shërbeu si administratore dhe koordinatore në Shkollat Publike të Zonës Mankato, një distrikt shkollor në distriktin e kongresit që përfaqësonte burri i saj nga 2007 deri në 2019.
Ngjarja e saj e parë publike si zonja e parë e Minesotës ishte një tubim në mbështetje të rivendosjes së të drejtave të votës për kriminelët. Ajo ka vizituar gjithashtu burgjet shtetërore dhe ka ndihmuar në rekrutimin e një ndihmës komisioneri që punon për të instaluar një kurrikulë të re kolegji në burgje. Walz u takua me bashkëshortin e saj në Nebraskën perëndimore, ku ajo filloi karrierën e saj duke mësuar anglisht. Ata u martuan në vitin 1994, pak më vonë, dy themeluan Educational Travel Adventures, Inc., e cila organizonte udhëtime vjetore në Kinë për studentët.
Walz dhe Kina
Zëvendëspresidenti i Kamala Harris, Tim Walz, tërhoqi menjëherë vëmendjen e Kinës pas përzgjedhjes. Përdoruesit kinezë të mediave sociale përmenden faktin se Walz ka dhënë mësim në provincën juglindore të Guangdong në 1989, kjo temë u kthye në trend në Weibo (rrjeti social i përdorur në Kinë, i kontrolluar nga qeveria) me 12 milionë shikime.
Ai dhe gruaja e tij, mësuesja Gwen Whipple, më vonë kaluan muajin e mjaltit po ashtu në Kinë.
Walz dikur e përshkroi vendimin e tij për të dhënë mësim në Kinë si "një nga gjërat më të mira që kam bërë ndonjëherë".
Ai sapo kishte mbaruar kolegjin kur u transferua në Kinë për të dhënë mësim në një shkollë të mesme historinë angleze dhe amerikane. Fakti që ndodhej në vitin 1989 - viti i masakrës së sheshit Tiananmen - nuk u shpëtoi komentuesve kinezë.
Më 4 qershor të atij viti, tanket kineze hynë në sheshin qendror të Pekinit, ku qindra mijëra ishin mbledhur duke kërkuar reforma politike. Dita përfundoi me gjakderdhje dhe sot e kësaj dite është e paqartë saktësisht se sa prej tyre vdiqën. Disa vlerësime thonë se numri i të vdekurve shkon mbi 10,000.
Përdoruesit kinezë të mediave sociale nuk mund të thonë shumë për vitin 1989 për shkak të censurës. Ata i referohen asaj me komentin “Nëse e dini, ju e dini”. Ata e vlerësojnë Walz të jetë më “kundër-Kinës” se të tjerët. E megjithatë përdoruesit shpresojnë se nëse ai fiton, ai mund të sinjalizojë lidhje më të mira SHBA-Kinë. Të dy vendet kanë qenë në mosmarrëveshje për tregtinë, teknologjinë e përparuar dhe ambiciet gjeopolitike të Kinës. Kinezët shprehen se Kina e sotme nuk është më ajo e 1989 dhe se Walz duhet të rikthej marrëdhëniet që janë shkëputur. Por ky opinion i jep përparësi republikanëve ta përdorin këtë kundër demokratëve./ZËRI/
