MOSKË- Rusia dhe Ukraina do të shpallin armëpushimin përgjatë gjithë vijës së frontit në Pashkë, që këtë vit festohet më 20 Prill sipas kalendarit Julian dhe Gregorian. Ukraina duhet të tërheqë trupat e saj nga rajoni i Kurskut të Rusisë dhe më pas në fund të prillit duhet të mbahet një Konferencë Ndërkombëtare e Paqes që do të zyrtarizojë një marrëveshje midis Rusisë dhe Ukrainës me ndërmjetësimin e SHBA-së, Kinës dhe vendeve evropian. Më pas, Ukraina dhe Rusia do të shkëmbejnë të burgosurit e luftës dhe jo vetëm me parimin "të gjithë për të gjithë".
"Strana", një faqe interneti pro-ruse nga Ukraina, bën me dije se kjo është skica e përafërt e planit të hartuar nga ekipi i presidentit amerikan Donald Trump, i cili u zotua se do t'i jepte fund luftës brenda 100 ditëve. E njëjta media thotë se amerikanët ua dorëzuan planin diplomatëve evropianë dhe tashmë ka mbërritur edhe në Ukrainë. Edhe pse faqja thotë se e ka draftin e marrëveshjes, ende nuk ka asnjë konfirmim se dokumenti është autentik.
Anulimi i dekretit
Në fazën tjetër, presidenti ukrainas Volodymyr Zelenskyy do të duhet të anulojë dekretin që ndalon negociatat me presidentin rus, Vladimir Putinin; më pas një takim midis Trump, Zelenskyy-t dhe Putin do të mbahet në shkurt, ose në gjysmën e parë të marsit. Ende nuk është vendosur nëse do të jetë dypalësh apo trepalësh. Për sa kohë që negociatat dhe armiqësitë vazhdojnë, Trump nuk do ta bllokojë apo ndalojë ndihmën ushtarake në Ukrainë. Deklarata e konferencës së paqes për përfundimin e luftës duhet të jetë gati deri më 9 maj dhe nga Ukraina do kërkohet që të mos e zgjasë gjendjen e jashtëzakonshme dhe mobilizimin pas kësaj date.
Faza e fundit është mbajtja e zgjedhjeve presidenciale në Ukrainë në fund të gushtit dhe zgjedhjeve parlamentare në fund të tetorit.
Dhe për çfarë do të bien dakord ukrainasit dhe rusët?
Ukraina do të duhet të heqë dorë nga anëtarësimi në NATO (dhe ky vendim duhet të miratohet në samitin e Aleancës), por në këmbim do të bëhet anëtare e BE-së deri në vitin 2030. Në të njëjtën kohë, Bashkimi Evropian do të marrë përgjegjësinë për rindërtimin e Ukrainës. Po kështu, Ukrainës nuk do i kërkohet që të zvogëlojë përmasat e ushtrisë së saj dhe SHBA do të vazhdojë të mbështesë modernizimin e forcave të saj të armatosura. Përveç kësaj, Ukraina do të heqë dorë nga përpjekjet ushtarake dhe diplomatike për të kthyer territoret e pushtuara, por ka të drejtë që të mos e njohë sovranitetin rus mbi to.
Çështja për kontigjentin paqeruajtës evropian pas përfundimit të armiqësive do të konsiderohet veçmas, pasi Kievi e kërkon, por Moska është kategorikisht kundër. Të gjitha veprimet kundër Kishës Ortodokse të Ukrainës dhe gjuhës ruse gjithashtu duhet të ndalen.
Në të njëjtën kohë, pas përfundimit të marrëveshjes së paqes, sanksionet ndaj Rusisë do të hiqen, disa kufizime do të hiqen menjëherë, të tjerat për 3 vjet, në varësi të respektimit të marrëveshjes nga Rusia. Të gjitha kufizimet për importin e energjisë ruse në Bashkimin Evropian do të hiqen, por importi i tyre do t'i nënshtrohet një takse të veçantë doganore dhe të ardhurat do të përdoren për rindërtimin e Ukrainës.
Kievi nuk e ka konfirmuar planin
Duhet të theksohet se udhëheqja ukrainase refuzoi të konfirmojë ekzistencën e këtij plani. Andriy Yermak, shefi i kabinetit të Presidentit të Ukrainës, deklaroi se “mediat nuk kanë asnjë ‘plan paqeje’", duke hedhur dyshime se draftin në media e ka publikuar Rusia./ZËRI
