SHBA- Dialogu dramatik midis Presidentit të SHBA-së Donald Trump dhe kryeministrit Izraelit Benjamin Netanyahu u raportua sonte nga një nga burimet gazetareske më të besueshme të Izraelit, "Channel 13". Sipas medias, Trump ndërhyri personalisht për të ndaluar një operacion ushtarak izraelit kundër Iranit. Ai e telefonoi Netanyahun dhe i kërkoi të anulonte sulmin ajror, duke i dhënë urdhrin e qartë: Thuaju aeroplanëve të kthehen mbrapsht.
Incidenti ndodhi disa orë pasi Irani shkeli armëpushimin e brishtë duke lëshuar dy raketa balistike. Trump, duke iu referuar një sulmi të mëparshëm izraelit, thuhet se i tha Netanyahut: I lëshuat gjithë arsenalin!
izraelit u përgjigj duke mohuar se sulmi ndodhi pasi filloi armëpushimi.
"Kjo nuk është e vërtetë, ne nuk kemi sulmuar që kur armëpushimi hyri në fuqi,"-thuhet se iu përgjigj kryeministri i Izraelit.
Pavarësisht shpjegimeve, Trump këmbënguli: Nuk më intereson, më fajësoni mua. Nuk ishte e qëllimshme, raketat nuk ranë dhe nuk pati dëme. Kështu iu përgjigj Trump duke iu referuar sulmeve iraniane dhe duke theksuar nevojën për të shmangur një shpërthim të ri të konfliktit.
Sipas gazetës "Times of Israel", ndërhyrja e Trump zbulon tensionin, por edhe ekuilibrin delikat politik midis SHBA-së dhe Izraelit në një kohë tensionesh të larta edhe në Lindjen e Mesme. Episodi tregon gjithashtu rolin e drejtpërdrejtë që presidenti amerikan mban në zhvillimet në rajon por edhe ndikimin e tij personal tek "Bibi".
Menjëherë pas bisedës, Netanyahu dha urdhrin për kthimin e avionëve. Sipas raportimeve në Izrael, avionët ishin vetëm "tre minuta larg objektivit" para se kryeministri izraelit të ndryshonte urdhrin. Madje shënjestra ishte shumë e qartë; ata kishin synuar anëtarët e Gardës Revolucionare.
Vetëm një aeroplan goditi një radar të vjetër, pasi nuk pati kohë të reagonte, dhe pjesa tjetër u kthye mbrapsht./ZËRI
