Hamasi drejt dobësimit? Netanyahu: Hezbollahu mos të luajë me zjarrin!

Benjamin Netanyahu dhe ushtare izrealite

GAZA - Organizata palestineze Hamas po dobësohet. Kështu shkruan gazeta gjermane “Bild”, ndërkohë që Izraeli po fiton gjithnjë e më shumë terren në Gaza, pasi ka rrethuar qendra të rëndësishme komanduese të grupimit militant.

Sipas ekspertëve të huaj, Izraeli ka hyrë fuqishëm në frontin e luftës dhe as Ministria e Luftës e qeverisë së Tel Avivit nuk e priste që operacionet ushtarake të kishin rezultate kaq inkurajuese. Në të kundërt, organizata palestineze Hamas është në dëshpërim.

Pas masakrës së 7 tetorit, në të cilën militantët e Hamasit vranë më shumë se 1200 izraelitë dhe shtetas të huaj u morën 239 pengje, aleati i tyre, SHBA, fillimisht këshilloi ushtrinë izraelite që të mos niste një fushatë në shkallë të gjerë.

Siç shkruan Richard Kemp, një kolonel në pension i Forcave të Armatosura Britanike, në artikullin e tij në gazetën britanike "Telegraph", qeveria e Uashingtonit vlerëson se një sulm i madh tokësor "do të çojë në një gjakderdhje midis ushtrisë izraelite (IDF) dhe Hamasit - dhe se do të ishte më pak efektive sesa një kombinim i sulmeve ajrore dhe sulmeve të forcave speciale.

Megjithatë, ushtria izraelite bëri të kundërtën. Ajo pushtoi Rripin e Gazës, e organizuar mirë dhe i mahniti kritikët e saj, thekson Richard Kemp në artikullin e tij.

Nga ana e tij, Ildo Kess, një komandant brigade në Forcat e Mbrojtjes së Izraelit (IDF) fokusohet në suksesin e Forcave të Armatosura izraelite, duke dhënë një intervistë për një nga gazetat më të mëdha të Izraelit, Ynet: "Hamasi kishte 1000 burra në Beit Hanoun dhe ishin përgatitur për luftë. Erdhën nga veriu dhe hynë natën. Forcat ajrore po bombardonin tunele ndërsa Hamasi nuk e kishte idenë se forcat tokësore po afroheshin”, thekson ai.

Kess shton gjithashtu se, në fazën e parë të ofensivës tokësore në Gaza, izraelitët arritën të imobilizonin armikun.

“Hamasi nuk ishte në gjendje të vepronte. Dhe më pas kaluam në fazën e dytë, që ishte shkatërrimi i qendrave të infrastrukturës dhe këtë e bëmë javën e kaluar.

Qytetet janë mjedisi më i vështirë në frontin e luftës, sidomos kur ushtria izraelite pritet - si në rastin e Hamasit - të përballet me "pozicione të panumërta të mbuluara të qitjes dhe depo me kurthe shpërthyese, snajperë dhe prita. Rrjeti i gjerë nëntokësor i tuneleve që Hamasi ka ndërtuar përfaqëson një tjetër element rreziku ekstrem," deklaroi Kess.

Militantët e Hamasit nën presion

Duke përdorur gratë dhe fëmijët si mburoja njerëzore dhe duke u fshehur në tunelet që Hamasi ka ndërtuar, ka shenja se luftëtarët do të mposhten, shkruan mediumi gjerman, duke cituar ekspertë.

"Një shenjë se Hamasi po humb në luftë është se raketat e lëshuara nga Rripi i Gazës janë qartësisht në nivelin e tyre më të ulët që nga fillimi i luftës dhe udhëheqësit e Hamasit thuhet se po i kërkojnë Hezbollahut të Libanit sulme të vazhdueshme në mënyrë që të shpërqendrojnë izraelitët," shton eksperti britanik i luftës.

Për më tepër, sipas ekspertit ushtarak Kemp, fakti që militantët e Hamasit janë nën presion, bëhet e qartë edhe nga fakti se ata kanë treguar gatishmëri për të “negociuar përmes Katarit për lirimin e pengjeve në këmbim të armëpushimit”.

Megjithatë, sipas deklaratave të Hamasit, dje organizata palestineze ndërpreu negociatat me Katarin me argumentin se Izraeli bombardoi spitalin "Al-Shifa" në Rripin e Gazës.

Grupi militant po përdor spitalin, pacientët dhe njerëzit që janë strehuar atje si mburojë njerëzore për shtabin e tyre, i cili ndodhet nën tokë, nën ndërtesë.

Megjithatë, kryeministri izraelit Benjamin Netanyahu tha dje në një intervistë për rrjetin televiziv amerikan "NBC" se "mund të ketë" një marrëveshje të mundshme për lirimin e disa prej 239 pengjeve të mbajtura nga Hamasi në Gaza që nga 7 tetori. Ai po ashtu ka theksuar se ky është informacion i klasifikuar për negociatat dhe për këtë nuk ka pranuar të japë më shumë detaje.

Në një fjalim televiziv të shtunën, 'Bibi' bëri të qartë se Izraeli do të mobilizojë të gjitha forcat e tij në luftën me Hamasin, duke shtuar: "Hamasi ka humbur kontrollin e Rripit verior bregdetar të Gazës dhe tani nuk ka vend të sigurt për t'u fshehur".

Netanyahu: Hezbollahu po luan me zjarrin

Kryeministri izraelit Benjamin Netanyahu lëshoi ​​një paralajmërim të ri të ashpër për Hezbollahun, i cili po vepron kundër Izraelit në kufirin verior. Kryeministri izraelit, duke iu referuar incidenteve të sigurisë në kufirin me Libanin, gjatë vizitës së tij në një njësi ushtarake, tha se Hezbollahu po luan me zjarrin.

“Ka disa që besojnë se ata mund të zgjerojnë sulmet kundër forcave tona dhe kundër civilëve. Ata po luajnë me zjarrin. Zjarrit të tyre do t'i përgjigjemi me zjarr shumë më të fortë. Të mos sprovohemi sepse kemi treguar vetëm pak nga forcat tona. Do të rivendosim sigurinë në veri dhe do të rivendosim sigurinë edhe në jug”, tha kreu i qeverisë izraelite.

Netanyahu madje vizitoi batalionin Karakal pranë gardhit të Gazës dhe në një fjalimin para ushtarëve, burra dhe gra, tha se fushata aktuale në Rripin e Gazës do të ishte një "luftë deri në fund".

Nga ana e tij, Benny Gantz, i cili merr pjesë në këshillin e luftës të qeverisë izraelite, i dërgoi një mesazh si Hamasit ashtu edhe Hezbollahut. "Unë u them armiqve tanë nga jugu dhe nga veriu - koha juaj ka ardhur," tha ai gjatë një turneu në zonat e përqendrimit në jug dhe vendbanimet në Rripin e Gazës.

Në të njëjtën kohë, ai iu referua atyre që janë larguar nga shtëpitë e tyre, por edhe pengjeve, duke thënë: “Dua t'u them se do të bëjmë gjithçka që të kthehen të sigurt në shtëpitë e tyre. Është e rëndësishme për mua t'i them gjithë shoqërisë izraelite dhe veçanërisht familjarëve të të rrëmbyerve - të jeni të sigurt se edhe në këto kohë ne po bëjmë gjithçka, ushtarakisht dhe politikisht, për t'i kthyer të dashurit tuaj", deklaroi zyrtari izraelit. /Zëri.ai/

Në përputhje me standarded JTI