TANZANI - Presidenti gjerman Frank-Ualter Steinmeier tha se ndihet i turpëruar për mizoritë e kryera nga fuqitë koloniale gjermane në Tanzani në fillim të shekullit të 20-të.
"Unë do të doja të kërkoja falje për atë që gjermanët u bënë paraardhësve tuaj këtu. Ajo që ndodhi këtu ishte historia jonë e përbashkët, historia e të parëve tuaj dhe historia e të parëve tanë në Gjermani”, tha presidenti gjerman në një fjalim në vendin afrikan.
Forcat gjermane vranë rreth 300000 njerëz gjatë një rebelimi vendas, në vitet 1905-1907. Ishte një nga kryengritjet më të përgjakshme antikoloniale.
Arsyeja e rebelimit të vendasve ishte kërkesa e gjermanëve që banorët e Tanzanisë të merreshin me vjeljen e pambukut të destinuar për eksport.
Autoritetet koloniale shkuan aq larg, sa të ekspozonin kokat e prera të udhëheqësve të rebelimit në muzetë e Gjermanisë. Familjarët e tyre tani kërkojnë që kafkat t'u kthehen, pasi të jenë identifikuar nga ADN-ja, çështje të cilën presidenti gjerman nuk e ka përjashtuar.
Gjermania kishte koloni territoret e Tanzanisë, Ruandës, Burundit dhe një pjesë të Mozambikut, që përbënin Afrikën Lindore Gjermane./Zëri.ai/
